बाजुराको बुढीगंगा नगरपालिकाको मतगणना ११ बजेबाट सुरु हुने भएको छ । केहीबेरअघि सम्पन्न सर्वदलीय बैठकले ११ बजेबाट मतगणनाको कार्य सुरु गर्ने निर्णय गरेको हो ।

नगरपालिकाको वडा नम्बर १ र १० को मतपेटिकाको गणनाको कार्य सुरु गरिने जिल्ला निर्वाचन कार्यालय बाजुराले जनाएको छ । मतगणनास्थलको सुरक्षा व्यवस्था कडा पारिएको छ ।

बुढीगंगामा १३ हजार ६ सय ५९  जना मतदातामध्ये नाै हजार एक सय २८ अर्थात् ६६ दशमलव ८३ प्रतिशत मतदान भएको थियो । गएको वैशाख ३० गते नै पालिका चुनाव भए पनि बुथ कब्जा भएको भन्दै विरोध भएपछि निर्वाचन आयोगले हिजो पुनः चुनाव गरेको हो ।

बुढीगंगा नगरपालिकाको मेयरमा नेपाली कांग्रेसबाट रंगबहादुर खाती र एमालेबाट रामबहादुर बानियाँले उम्मेदवारी दिएका छन् ।