- वि.सं २०८१ बैशाख ७ शुक्रबार
माओवादी केन्द्रका अध्यक्ष पुष्पकमल दाहाल प्रचण्डले मंगलबार रामेछापमा भएको बस दुर्घटनामा परी १३ जनाको निधन भएको खबरले आफू मर्माहत भएको बताएका छन् ।
अध्यक्ष प्रचण्डले उक्त दुर्घटनामा परी ज्यान गुमाउनेप्रति भावपूर्ण श्रद्धाञ्जली र शोकाकूल परिवारजनमा गहिरो समवेदना प्रकट गरेका छन् । उनले घाइतेको शीघ्र स्वास्थ्यलाभको कामनासमेत गरेका छन् ।
रामेछापबाट काठमाडौं आउँदै गरेको बा.३ख ८३९६ नम्बरको यात्रुवाहक बस रामेछापको सुनापती गाउँपालिका– ५ र खाँडादेवी गाउँपालिका– १ स्थित सिमानामा मंगलबार बिहान ब्रेक फेल भएर दुर्घटना भएको थियाे । बस लुभुघाट सडकको मोडबाट करिब सय मिटर तल भिरमा खसेको थियो ।
दुर्घटनामा परी घटनास्थलमै नौ र चारजनाको धुलिखेल अस्पतालमा उपचारका क्रममा मृत्यु भएको हाे । दुर्घटनामा परी बसमा सवार २४ जना घाइते भएका छन् ।
घाइतेमध्ये तीनजनालाई हेलिकोप्टरमार्फत तथा बाँकी २१ जनालाई एम्बुलेन्स र जिपमा राखेर उपचारका लागि धुलिखेल अस्पतालमा भर्ना गरिएको छ। चालक र सहचालक भने हाम फालेर जोगिएका छन् ।
