जिल्ला समन्वय समिति मुगुको प्रमुख र उपप्रमुखमा नेपाली कांग्रेसका उम्मेदवार निर्विरोध चयन भएका छ्न्। कांग्रेसका मञ्जनबहादुर कार्की समन्वय समितिको प्रमुखमा र नैली कार्की उपप्रमुखमा निर्विरोध चयन भएका हुन्।
जिसस सदस्यहरूमा कांग्रेसबाट एक खुला सदस्य, एक दलित अल्पसंख्यक सदस्य र तीन महिला सदस्य गरी पाँचजना निर्विरोध चयन भएका छन् । त्यसैगरी, नेकपा (माओवादी केन्द्र)बाट एक खुला सदस्य र नेकपा (एकीकृत समाजवादी)बाट एक खुला सदस्य निर्विरोध भएका छन्।
कांग्रेसबाट झमुरा रावल, पञ्चकला नेपाली, सुन्तला मल्ल, सोनाम लामा, ध्रुव विक, एकीकृत समाजवादीबाट दानबहादुर रावल र माओवादी केन्द्रबाट कर्णप्रसाद माठागाईं संज्याल सदस्यमा निर्विरोध चयन भएका मुख्य निर्वाचन अधिकृतको कार्यालय मुगुले जनाएको छ।
जिल्ला समन्वय समितिमा पनि कांग्रेस, माओवादी केन्द्र र एकीकृत समाजवादीबिच गठबन्धन भएको थियो। जिल्लामा रहेका चार स्थानीय तहमध्ये एमालेले मुगुम कार्मारोङ गाउँपालिकामा एक मात्र उपाध्यक्ष पद जितेको थियो। जिसस निर्वाचनमा समर्थक र प्रस्तावक नहुँदा एमालेले उम्मेदवारी दर्ता गराएको थिएन।
जिससमा कांग्रेसको एकल बहुमत भए पनि तीनदलीय गठबन्धनलाई कायम राख्न माओवादी र एकीकृत समाजवादीलाई एक–एक सदस्य दिएको कांग्रेस सभापति ऐनबहादुर शाहीले बताए।
वैशाख ३० को स्थानीय तह निर्वाचनमा कांग्रेसले जिल्लामा दुई प्रमुख र तीन उपप्रमुख गरी पाँच पदमा जित हात पारेको थियो। माओवादी केन्द्र र एकीकृत समाजवादीले एक–एक प्रमुख पद जितेका थिए।