सेयर बजारमा निरन्तर गिरावट आएपछि लगानीकर्ता आन्दोलनमा जुटेका छन् । पुँजी बजारमा लगानीको वातावरण बनाउन माग गर्दै नेपाल उद्योग वाणिज्य महासंघको पुँजी बजार विकास समिति, नेपाल इन्भेस्टर्स फोरम, सेयर लगानीकर्ता संघ, सेयर लगानीकर्ता दबाब समूह, नेपाल धितोपत्र लगानीकर्ता संघ र स्वतन्त्र पुँजी बजार संघ एकताबद्ध भएका हुन् ।

उनीहरूले पुँजी बजार सुधार संघर्ष समितिमार्फत उठाएका १९ बुँदे माग तत्काल सम्बोधन गरी पुँजी बजारलाई विश्वासमा लिन र लगानीको वातावरण बनाउनुपर्ने बताएका छन् । ३२ सयको बिन्दुबाट निरन्तर झरेको बजार हाल घटेर दुई हजारआसपासको बिन्दुमा आइपुगेको छ । पुँजी बजारको नियामक निकायले ध्यान नदिँदा र नीतिगत कुरामा बजारलाई नियन्त्रण गर्न खोज्दा बजार घट्न पुगेको र लगानीकर्ताले राख्दै आएको माग सम्बोधन नगरेको आरोप लगानीकर्ताको छ ।

माग पूरा नहुँदासम्म आन्दोलन जारी राख्ने सेयर बजार दबाब समूहका महासचिव नयन बाँस्तोलाले जानकारी दिए । ‘धेरैपटक हामीले माग सम्बोधन गर्न अनुरोध गर्दा पनि भएन, अब वारपार गरेर अघि बढ्ने हो, आशा छ सरकारले कुरा सुन्छ,’ बाँस्तोलाले भने ।

संयुक्त प्रेस विज्ञप्ति जारी गर्दै लगानीकर्ताले सरकारले तोकिएका कामहरू समयमै नगर्दा पुँजी बजारमा गम्भीर समस्या उत्पन्न भएकाले त्यसको समाधानका लागि आन्दोलनमा उत्रिनुपरेको जनाएका छन् । लगानीकर्तालाई उत्तेजित र आक्रोशित पार्ने कार्य भएमा त्यसले देशको अर्थतन्त्रमा समेत गम्भीर क्षति पुग्ने लगानीकर्ताको भनाइ छ । लगानीकर्ताले राष्ट्र बैंकले सेयर धितो कर्जामा लगाउँदै आएको ४–१२ करोडको सीमा कर्जा हटाइनुपर्ने मुख्य माग राख्दै आएका छन् ।

त्यस्तै, नेपाल इन्भेस्टर फोरमका पूर्वअध्यक्ष छोटेलाल रौनियारले देशका अधिकांश क्षेत्रका नागरिक अहिले पुँजी बजारमा जोडिएकाले त्यसतर्फ सचेत रहन सम्बन्धित पक्षलाई समेट्ने गरी नीति ल्याइनुपर्ने बताए । ‘बोर्डले कहिले ५१ कम्पनीको सूची निकाल्ने, सिसिडी रेसियो हटाउने, ४–१२ को क्याप ल्याउने व्यवस्थाले पुँजी बजार प्रभावित भएको छ, सरकारले नसुनेसम्म आन्दोलन जारी राख्छौँ,’ उनले भने ।

त्यस्तै, लगानीकर्ताले बोनसमा लाभांश कर हटाउन, पुँजीगत लाभकर कम गर्न, स्थिर ब्याजदर कायम गर्न, १९ बुँदे माग पूरा गर्नजस्ता माग गरेका छन् । प्रदर्शनमा ब्रोकर र मर्चेन्ट बैंकहरूले ऐक्यबद्धता जनाउँदै सहभागी भएका छन् ।