दार्चुलाको त्रिदेशीय सीमानजिकैको तिंकर गाउँमा पहिलोपटक टेलिफोनको पहुँच पुगेको छ। चीनको सीमानजिकै रहेको व्याँस गाउँपालिका– १, तिंकरमा पहिलोपटक नेपाल टेलिकमको एनटिसेट लाइन जडान भएको हो । नेपाल टेलिकम दार्चुलाले तिंकर गाउँमा दुईवटा एनटिसेट लाइन जडान गरेको हो । सञ्चार सम्बन्धबाट टाढा रहेको व्याँस गाउँपालिकाको तिंकरमा पहिलोपटक ‘भिसेट एनटिसेट’ जडान गरिएको व्याँस गाउँपालिका– १ का वडासचिव विनोदसिंह बुढाथोकीले जानकारी दिए ।

यससँगै व्याँस गाउँपालिका– १, छाँगरूको ज्याक्तीमा नेपाल टेलिकमको ‘फोरजी’सहितको टेलिफोन टावर जडान सुरु गर्ने तयारी पनि भएको छ । यसअघि छाँगरूमा सशस्त्र प्रहरी र स्थानीयका लागि भनी एनटिसेट लाइन जडान गरिएको थियो । हाल स्काई फोनको सुविधा रहेको छाँगरू गाउँमा फोरजीसहितको नेपाल टेलिकमको लाइन जडानको तयारी छ । 

सामरिक महत्व बोकेको छाँगरू तिंकरमा टेलिफोन सेवा सञ्चालन गर्न पछिल्लो समय टेलिकम दार्चुलाका प्रमुख कृष्णबहादुर गुरुङ आफैँ खटिएका थिए । सशस्त्र प्रहरी बल, नेपाल नम्बर ५० गुल्मका गुल्मपति धीरेन्द्र शाहले भने, ‘छाँगरूको ज्याक्ती डाडामा फोरजी जडान हुँदै छ । सोलार ब्याट्री अपुग भएका कारण केही समय लाग्न सक्छ ।’
तिंकर गाउँमा भने ल्यान्डलाइन सुचारु गरिएको छ । अहिले तिंकर गाउँका लागि ९९४९३००५० र ९९४९३००५१ नम्बर सुचारु गरिएको वडासचिव बुढाथोकीले जानकारी दिए । यसअघि यहाँका नागरिकले फोन सेवाबाट वञ्चित हुनुपरेको थियो । छाँगरूमा फोन लागे पनि तिंकरमा फोन लाग्दैन थियो ।

टेलिकमको फोरजी सेवा सुचारु भए छाँगरू मात्र नभई भारतले अतिक्रमण गरेको कालापानी, कुटी, गुञ्जी र नाभीलगायतका क्षेत्रसम्म नेपाली फोनको पहुँच हुनेछ । ज्याक्ती डाँडाबाट कालापानी, गुञ्जी र कुटी गाउँ सहजै देख्न सकिन्छ ।