पाँचदलीय सत्तारुढ गठबन्धनको कार्यदलमा स्थानीय तह निर्वाचनको समीक्षा भएको छ । कांग्रेस वरिष्ठ नेता रामचन्द्र पौडेल संयोजकत्वको कार्यदलमा स्थानीय तह निर्वाचनको समीक्षा भएको हो ।
प्रधानमन्त्रीनिवास बालुवाटारमा जारी बैठकमा सहभागी राष्ट्रिय जनमोर्चाकी उपाध्यक्ष दुर्गा पौडेलका अनुसार बैठकमा निर्वाचनको समीक्षा भइरहेको छ । जनमोर्चाबाट कार्यदल सदस्य हिमाल पुरी उपस्थित नभएपछि मंगलबारको बैठकमा पौडेल गएकी हुन् ।
स्थानीय तह निर्वाचनमा तालमेल गरेर जाने निर्णयअनुसार सत्तासाझेदार दलले समिति गठन गरेका थिए ।
पौडेल नेतृत्वको समितिमा पाँचै दलका प्रतिनिधि सदस्य छन् । समितिका सदस्यमा कांग्रेसबाट गगन थापा र ज्ञानेन्द्रबहादुर कार्की, माओवादीबाट वर्षमान पुन र देवप्रसाद गुरुङ, एकीकृत समाजवादीबाट बेदुराम भुसाल र विजय पौडेल, जसपाबाट अशोक राई र रेणु यादव तथा राष्ट्रिय जनमोर्चाबाट हिमाल पुरी छन् ।