- वि.सं २०८१ बैशाख १२ बुधबार
क्राइस्टचर्च सहरका दुई मस्जिदमा प्रार्थनाका लागि भेला भएकाहरूमाथि श्वेत अतिवादीद्वारा अन्धाधुन्ध गोली प्रहार
न्युजिल्यान्डको क्राइस्टचर्च सहरका दुई मस्जिदमा शुक्रबार दिउँसो आतंककारी हमला हुँदा ४९ जनाको मृत्यु भएको छ । स्थानीय समयअनुसार झन्डै १ बजेर ४० मिनेटमा डिन्स एभिन्युस्थित अल–नूर मस्जिदमा प्रार्थना गर्न गएकामाथि गोली प्रहार भएको थियो । त्यसको आधा घन्टापछि अलविन्स आर्डीको लिनवुड मस्जिदमा पनि आक्रमण भयो । घाइते ५० मध्ये २७ को अवस्था गम्भीर रहेको स्थानीय सञ्चारमाध्यमले जनाएका छन् ।
प्रधानमन्त्री ज्यासिन्दा आर्डेनले यसलाई इतिहासकै कालो दिनको संज्ञा दिएकी छिन् । गोली प्रहार गरेको आरोपमा प्रहरीले तीनजनालाई पक्राउ गरेको छ । प्रहरीले अन्यत्र पनि लुकाइराखिएको बम तथा विस्फोटक पदार्थ डिफ्युज गरेको छ ।
फेसबुक लाइभ गर्दै अन्धाधुन्ध गोली प्रहार
अल–नूर मस्जिदमा प्रार्थनाका लागि करिब ३ सय मानिस भेला भएका वेला आक्रमण भएको थियो । त्यसमध्ये ४१ जनाले ज्यान गुमाएका छन् । गोली चलाउने व्यक्तिले फेसबुकमा हमलाको प्रत्यक्ष प्रसारण गरेका थिए । सो भिडियोमा उनले मस्जिदभित्रका महिला, पुरुष र बालबालिकामाथि गोली बर्साएको देखिएको थियो । प्रहरीले उक्त भिडियो नहेर्न आमनागरिकलाई आग्रह गरेको छ । फेसबुकले उक्त भिडियो हटाइने जनाएको छ । आक्रमणकारीले आफूलाई अस्ट्रेलियन नागरिक ब्रेन्टन टारान्ट भएको जनाएका छन् । आक्रमणअघि नै टारान्टले मुस्लिम तथा आप्रवासीविरुद्ध लक्षित ७४ पृष्ठको दस्तावेज उग्रदक्षिणपन्थी च्याट रुममा पोस्ट गरेका थिए ।
अस्ट्रेलियाका प्रधानमन्त्री स्कट मोरिसनले टारान्ट आफ्नो देशका नागरिक भएको र अतिवादी दक्षिणपन्थी समूहसँग सम्बन्धित व्यक्ति भएको पुष्टि गरे । यद्यपि न्युजिल्यान्ड प्रहरीले पक्राउ व्यक्तिबारे विवरण सार्वजनिक गरेको छैन । उनलाई शनिबार अदालतमा पेस गरिने जनाइएको छ । आक्रमणको बेला बंगलादेशी क्रिकेट टोली पनि त्यही मस्जिद पुगेको थियो । टोलीका सबै सकुशल रहेको जनाइएको छ ।
आधा घण्टापछि अल नुरभन्दा ६ किलोमिटर टाढाको लिनवुड मस्जिदमा भएको आक्रमणमा ७ जनाले ज्यान गुमाए । सानो मस्जिदमा त्यसबेला करिब ७० जना भेला भएको प्रत्यक्षदर्शीले बताएका छन् ।
यो दोस्रो विश्वयुद्धपछि न्युजिल्यान्डमा भएको सबैभन्दा ठूलो हत्याकाण्ड हो । सन् १९४३ मा जापानी सैनिकहरूलाई बन्दी बनाएर राखिएको फेदरस्टोन क्याम्पमा न्युजिल्यान्डका सैनिकले गोली बर्साउँदा ४८ बन्दी र एक सुरक्षागार्डको मृत्यु भएको थियो ।
आक्रमणपछि क्राइस्टचर्च र सिंगै न्युजिल्यान्ड स्तब्ध बनेको छ । प्रहरीले सुरक्षा व्यवस्था कडा बनाएको छ । सबै विद्यालयहरू बन्द गरिएका छन् । घाइतेहरूको उपचार भइरहेको क्राइस्टचर्च अस्पतालले तत्कालका लागि नियमित सेवा बन्द गरेको छ । प्रहरीले मस्जिदहरू तत्कालका लागि बन्द गर्न आग्रह गरेको छ ।
हमलाको विश्वका नेताहरूले निन्दा गरेका छन् । अमेरिकी राष्ट्रपति डोनाल्ड ट्रम्प, रुसी राष्ट्रपति भ्लादिमिर पुटिन, जर्मन चान्सलर एन्जेला मर्केललगायतले समवेदना दिएका छन् ।
मुस्लिमबहुल राष्ट्रका नेताहरूले पश्चिमा विश्वमा बढ्दै गएको ‘इस्लामोफोबिया’ प्रति चिन्ता व्यक्त गरेका छन् । टर्कीका राष्ट्रपति रेसेप तैयप एर्दोगान, पाकिस्तानी प्रधानमन्त्री इमरान खानलगायतले आक्रमणको भत्र्सना गरेका छन् ।
