रुपन्देहीमा स्थानीय निर्वाचनका लागि मतदानस्थलहरूमा कर्मचारी तथा सुरक्षाकर्मीहरू मंगलबारबाट खटिएका छन् । रुपन्देहीका प्रमुख जिल्ला अधिकारी ऋषिराम तिवारीले मंगलबारबाट कर्मचारी तथा सुरक्षाकर्मी मतदानस्थलहरूमा खटिएको बताए ।
रुपन्देहीका जिल्ला निर्वाचन अधिकारी अयोध्याप्रसाद भण्डारीका अनुसार रुपन्देहीका दुई सय आठ मतदानस्थलमा सात सय मतदान केन्द्र रहेका छन् । यी केन्द्रहरूमा झन्डै १२ हजार कर्मचारी तथा सुरक्षाकर्मी परिचालन गरिएको छ ।
रुपन्देहीमा तीन लाख २३ हजार सात सय ७८ पुरुष, तीन लाख आठ हजार पाँच सय ७४ महिला, आठ अन्य गरी ६ लाख ३२ हजार तीन सय ६० मतदाता रहेका छन् । यहाँ एक उपमहानगरपालिका, पाँच नगरपालिका र १० वटा गाउँपालिका रहेका छन् । यहाँ सबैभन्दा धेरै मतदाता बुटवल उपमहानगरपालिकामा ९० हजार ६५ रहेका छन् ।