जिल्ला प्रशासन कार्यालय बाँकेले बेमौसमी बर्सातले धानबालीमा पारेको क्षतिको विवरण शुक्रबार गृह मन्त्रालयमा पठाएको छ । तीनवटा स्थानीय तहको प्रारम्भिक विवरणसमेतलाई समेटेर ३८ करोड रुपैयाँको क्षति विवरण पठाएको प्रमुख जिल्ला अधिकारी सूर्यबहादुर खत्रीले जानकारी दिए ।

पटक–पटक ताकेता गर्दा पनि बैजनाथ, राप्तीसोनारी र नेपालगन्ज उपमहानगरले क्षतिको विवरण नबुझाएको उनले बताए । ‘गृह मन्त्रालयले क्षतिको विवरण पठाउने अन्तिम समयसीमा २० माघसम्म दिएको थियो ।

स्थानीय तहलाई विवरण बुझाउन पटक–पटक ताकेता गर्दासमेत नदिएपछि उनीहरूले दिएको प्रारम्भिक तथ्यांकलाई आधार मानेर अनुमानित रकम पठायौँ,’ उनले भने । रकम आउने बित्तिकै पीडित किसानलाई वितरण गरिने उनले बताए ।