Skip This
प्रदेशको नामकरणबारे विज्ञ र सरोकारवालासँग छलफल थाल्न र प्रदेशको आन्तरिक संरचना निर्माण गर्न प्रदेश १ सरकारले अलगअलग समिति निर्माण गरेको छ । आइतबार साँझ बसेको प्रदेश १ मन्त्रिपरिषद् बैठकले प्रदेशको नामकरणबारे विज्ञ र सरोकारवालासँग छलफल गर्न सामाजिक विकासमन्त्री जयराम यादवको नेतृत्वमा कार्यदल गठन गरेको छ ।
प्रदेश १ सरकारका प्रवक्ता आर्थिक मामिला तथा योजनामन्त्री इन्द्रबहादुर आङ्बोका अनुसार उक्त्त कार्यदलले आवश्यक छलफल गरेर नामकरणबारे सरकारलाई प्राथमिकताका आधारमा प्रतिवेदन दिनेछ । र, सरकारले सोही प्रतिवेदनका आधारमा प्रदेश सभामा नामकरणबारे प्रस्ताव दर्ता गराउनेछ ।
बैठकले प्रदेशको आन्तरिक संरचना निर्माणका लागि जग्गा खोज्न पनि कार्यदल गठन गरेको छ । प्रदेश १ सरकारका आन्तरिक मामिला तथा कानुनमन्त्री केदार कार्कीको नेतृत्वमा गठन भएको कार्यदलमा बृहत्तर विराटनगर क्षेत्रभित्र पर्ने मोरङको विराटनगर महानगरपालिका, कटहरी गाउँपालिका, ग्रामथान गाउँपालिका र सुन्दरहरैँचा नगरपालिकाका प्रमुख र सुनसरीको इटहरी उपमहानगरपालिका र दुहबी नगरपालिकाका प्रमुख सदस्य रहनेछन् ।
प्रदेश १ मुख्यमन्त्री तथा मन्त्रिपरिषद् कार्यालयका प्रशासनिक सुधार आयोग सदस्य सचिव रहने उक्त्त कार्यदलले आवश्यक पर्ने जग्गा खोजबिन गरी संरचना एकैठाउँमा निर्माण गर्न सरकारलाई प्रतिवेदन दिनेछ ।
