कञ्चनपुरस्थित नेपाल–भारत सीमानाकामा आवतजावतमा कडाइ गरिने भएको छ । कोरोना महामारी बढ्दै गएपछि जिल्ला कोभिड व्यवस्थापन समितिले सीमा नाकाहरूमा कडाइ गर्ने निर्णय गरेको हो ।
आइतबार कञ्चनपुरका प्रमुख जिल्ला अधिकारी रामप्रसाद पाण्डेको अध्यक्षमा बसेको जिल्ला कोभिड व्यवस्थापन समितिको बैठकले आइतबार १२ बजेदेखि लागू हुने गरी आवतजावतमा कडाइ गर्ने निर्णय गरेको हो ।
अति आवश्यकीय कामका लागि कोभिड १९ विरुद्ध लगाएको खोप कार्ड मोबाइलमा राखेर सुरक्षाकर्मीलाई देखाउनुपर्ने भएको छ । विवाह, ब्रतवन्धजस्ता सामाजिक कार्यका लागि २५ जनाभन्दा बढी जम्मा नहुन भनिएको छ ।
एम्बुलेन्समा अनिवार्य जिपिएस राख्न लगाउने र सचेतनाका लागि अभियान सञ्चालन गर्ने निर्णय पनि भएको छ ।