देशभक्त जनगणतान्त्रिक मोर्चा नेपालका अध्यक्ष सिपी गजुरेलले एमसिसी संसदमा पुगेपछि पारित हुने सम्भावना रहेकाले संसदमै लैजानदिनु नहुने बताएका छन् । आइतबार माइतीघर मण्डलामा आयोजित विरोध प्रदर्शनमा गजुरेलले एमसिसी संसदमै लैजान दिनु नहुने बताएका हुन् । 

उनले अमेरिकाले एमसिसी सम्झौतामार्फत दिने भनिएको रकमभन्दा परिणाम घातक रहेको उल्लेख गरे । गजुरेलले अमेरिका नेपालमा आइसकेपछि पछि नहट्ने र रणनीतिक महत्वका ठाउँहरूमा आफ्नो अखडा खडा गर्ने भएकाले एमसिसी पास गर्न नहुने बताए । 

‘एमसिसीको बहानामा अमेरिका नेपालभित्र पसिसकेपछि यहाँबाट पछि हट्ने छैन । उसले रणनीतिक महत्वका ठाउँहरूमा आफ्नो अखडा खडा गर्नेछ । एमसिसी खारेजीको अभियान नेपालकै लागि चलाइएको हो । हामीले यसलाई संसदमा एजेन्डाका रूपमा लैजान दिनुहुँदैन । लग्ने र टेबल गर्ने बित्तिकै पारित हुने वाला छ ।’