सरकारले राष्ट्रिय सभाको निर्वाचन १२ माघमा गर्ने निर्णय गरेको छ । बिहीबार बसेको मन्त्रिपरिषद् बैठकले निर्वाचनको मिति तय गरेको हो । यसअघि ८ कात्तिकमा निर्वाचन आयोगका पदाधिकारीले प्रधानमन्त्री शेरबहादुर देउवालाई भेटेर निर्वाचनको मिति तोक्न आग्रह गरेका थिए । 

राष्ट्रिय सभाका २० सदस्यको पदावधि आगामी २० फागुनमा सकिँदै छ । रिक्त हुन गइरहेका एक मनोनीतबाहेकका १९ पदका लागि ३५ दिनअगावै निर्वाचन गरेर पदपूर्ति गर्नुपर्ने व्यवस्था छ । एमालेका आठ, माओवादी केन्द्रका चार, नेकपा एकीकृत समाजवादीका चार, कांग्रेसका तीन र मनोनीत एक सांसद राष्ट्रिय सभाबाट बिदा हुँदै छन् ।

राष्ट्रिय सभाको निर्वाचनमा पनि सत्तारुढ गठबन्धन एक भएर जाने निर्णय गरिसकेका छन् । गत २२ कात्तिकमा बसेको गठबन्धनको बैठकले सरकारको काम प्रभावकारी बनाउन समन्वय समिति गठनदेखि राष्ट्रिय सभा निर्वाचन तथा प्रतिनिधिसभा र प्रदेश सभा उपनिर्वाचनसम्म गठबन्धनलाई निरन्तरता दिने निर्णय गरेको थियो ।