कांग्रेस सहमहामन्त्री डा. प्रकाशशरण महतले आगामी निर्वाचनमा बहुमत ल्याएर एकल सरकार बनाउने प्रतिबद्धताका साथ आमनागरिकको सेवामा उत्रिन नेता तथा कार्यकर्तालाई आग्रह गरेका छन् । शनिबार कांग्रेस बूढानीलकण्ठ नगर समितिको दोस्रो अधिवेशनको उद्घाटन गर्दै महतले अहिले कांग्रेसको नेतृत्वमा नयाँ सरकार बने पनि विभिन्न वैचारिक धरातलमा उभिएका राजनीतिक दलहरूको गठबन्धन सरकार भएकाले समस्या भएको बताएका हुन् ।

उनले अघिल्लो निर्वाचनमा अधिक मत पाएको राजनीतिक दल सरकार सञ्चालन गर्न अक्षम भएकाले संविधानअनुरूप नयाँ सरकार गठन गर्ने अवस्था सिर्जना भएको बताए । महतले वर्तमान सरकारले संविधानअनुरूप राज्य सञ्चालन गर्ने, देशमा कानुनी शासन कायम गर्ने, लोकतन्त्र र संविधानको रक्षा गर्ने, आमनागरिकलाई विश्वव्यापी महामारीको रूपमा फैलिएको कोरोना संक्रमणको भयबाट मुक्ति दिने र पूर्ववर्ती सरकारले खलबल्याएको वैदेशिक सम्बन्धलाई सुमधुर बनाउँदै देश र जनताको हितमा काम गरिरहेको दाबी गरे । 

सत्ता साझेदार दलहरूको घुर्की, धम्की, अनुनय र विनयका आधारमा चल्ने सरकारबाट कांग्रेसले लिएका नीति, कार्यक्रम र लक्ष्यहरू हासिल हुने गरी सरकारले काम गर्न नसक्ने स्पष्ट महतले आउने निर्वाचन जितेर एकल सरकारमार्फत आफ्ना कार्यक्रम लागू गर्न तयारी अवस्थामा रहन कार्यकर्ताहरूलाई आग्रह गरे ।