गृहमन्त्री बालकृष्ण खाँणले चाडपर्वमा छुट तथा सहुलियत दिएर व्यापार गर्न व्यवसायीहरूलाई आग्रह गरेका छन् । बिहीबार दिउँसो सुरक्षा निकायका प्रमुख, अनुगमनकारी निकायका प्रमुख, व्यवसायी, उपभोक्ताकर्मीलगायतसँग अन्तक्र्रिया गर्दै उनले यस्तो बताएका हुन् ।

छलफलमा मन्त्री खाँणले कोरोना भाइरसका कारण जनजीवन प्रभावित बनेकाले आमनागरिकको क्रयशक्ति कमजोर भएको बताए । बैठकमा उद्योग वाणिज्य महासंघका उपाध्यक्ष दिनेश श्रेष्ठले विषम परिस्थितिमा पनि व्यवसाय गरेर उपभोक्तालाई सेवा दिइरहेको बताए ।

उनले नागरिकप्रति उत्तरदायित्व भएर व्यवसाय गर्ने जानकारी दिँदै अनुगमनका नाममा दुःख नदिन आग्रह गरेका थिए । त्यस्तै, चेम्बरका वरिष्ठ उपाध्यक्ष कमलेश अग्रवालले अनुगमनका नाममा  व्यवसायीलाई निरुत्साहित गर्न नहुने धारणा राखेका थिए ।