प्रधानसेनापति प्रभुराम शर्माले नेपाली सेनालाई समयसापेक्ष, सक्षम, रूपान्तरित, गतिशील र प्रभावकारी संगठनका रूपमा विकास गर्ने बताएका छन् । बिहीबार नेतृत्व सम्हालेका शर्माले शुक्रबार सकलदर्जाका नाममा सम्बोधन गर्दै सैनिक अनुशासन, पदीय मर्यादा र आचरण उल्लंघन गरी सेनाको तेजोबध हुने गतिविधि नगर्न निर्देशनसमेत दिएका छन् ।
‘कुनै किसिमका सैनिक अनुशासन, पदीय मर्यादा र आचरणविपरीतका गतिविधि तथा संगठनलाई सीमित समूहको हितमा उपयोग गर्ने र फौजको मनोबल गिराउनेजस्ता अवाञ्छित गतिविधि किमार्थ क्षम्य हुने छैनन्,’ शर्माले भने, ‘नेपालको स्वतन्त्रता, सार्वभौमसत्ता, भौगोलिक अखण्डता, स्वाधीनता र राष्ट्रिय एकताको रक्षालगायत संविधानप्रदत्त सम्पूर्ण जिम्मेवारी प्रभावकारी रूपमा सम्पन्न गर्न सक्षम, सुदृढ, आधुनिक र व्यावसायिक सैनिक संगठन तयार गरिनेछ ।’ यसका लागि नेपालको संविधान, राष्ट्रिय सुरक्षा नीति, राष्ट्रिय प्रतिरक्षा नीति र नेपाली सेनाको दीर्घकालीन सोच २०८७ अनुसार समयानुकूल सांगठनिक सुदृढीकरण, जनशक्तिको विकास, स्रोतसाधनको उचित व्यवस्थापन तथा प्रविधिको उच्चतम् प्रयोगलाई संस्थागत गरिने बताए ।
प्रधानसेनापति शर्माले सैनिक परम्पराअनुसार सबैलाई सम्बोधन गर्दै कमान्ड नीति तथा मार्गनिर्देशन– २०७८ पनि जारी गरेका छन् । सैनिक सूचना तथा जनसम्पर्क निर्देशनालयका अनुसार राष्ट्रिय सुरक्षा, संगठन सञ्चालन, व्यावसायिक तालिम, पेसागत वृत्तिविकास, सबल बन्दोबस्ती प्रणाली र कल्याणकारी कार्यलाई प्राथमिकतामा राखेर प्रधानसेनापतिले मार्गनिर्देशन जारी गरेका हुन् ।
उनले अन्तर्राष्ट्रिय, क्षेत्रीय र राष्ट्रिय सुरक्षा वातावरण अनिश्चित, अस्थिर, तरल र जटिल रहेको विश्लेषण गर्दै संवैधानिक दायित्वअनुसार यसको सामना गर्ने पनि बताए । ‘नेपालको संविधानले नेपाली सेनालाई देशको स्वतन्त्रता, सार्वभौमसत्ता, भौगोलिक अखण्डता, स्वाधीनता र राष्ट्रिय एकताको रक्षा तथा जगेर्ना गर्न महत्वपूर्ण दायित्व सुम्पेको छ,’ शर्माले भने, ‘जस्तोसुकै जटिल परिस्थितिमा समेत संवैधानिक दायित्वलाई प्रभावकारी रूपमा सम्पादन गर्दै राष्ट्रहित र स्वार्थको संरक्षण तथा प्रवद्र्धन गर्नका लागि सदैव तयार रहनु सेनाको प्रमुख कर्तव्य हो ।’
नेपाल सरकारद्वारा जारी भएको ‘राष्ट्रिय सुरक्षा नीति’ र ‘राष्ट्रिय प्रतिरक्षा नीति’अनुरूपको ‘राष्ट्रिय सैनिक रणनीति’को निर्माण र वैधता प्राप्त गर्दै सैनिक मूलग्रन्थ पुनरावलोकन गर्ने पनि प्रधानसेनापतिले बताए । ‘यिनै नीति, रणनीति र मूलग्रन्थलाई आधार मानेर ‘३ जोड १ कमान्ड’को सफल कार्यान्वयन गरिँदै लगिनेछ,’ उनले भने ।
अस्पताल र अक्सिजन प्लान्ट स्थापना गर्ने घोषणा
प्रधानसेनापति शर्माले स्वास्थ्य क्षेत्रमा सेवा विस्तारका लागि लुम्बिनी प्रदेशमा २५ शय्याको फिल्ड अस्पताल स्थापना गर्ने घोषणा गरे । उनले उक्त अस्पताल आगामी सेना दिवस २०७९ बाट सञ्चालन गर्ने पनि बताए । ‘वीरेन्द्र अस्पतालमा मुटुरोग निदान र उपचारका लागि क्याथल्याब स्थापना गरिनेछ,’ उनले भने, ‘त्रि–चन्द्र मिलिटरी अस्पतालको सुविधा विस्तार गरिनुका साथै वीरेन्द्र अस्पताल र उपत्यकाबाहिर अक्सिजन प्लान्टको स्थापना गरिनेछ ।’
१० वर्ष सेवा गरेका सैनिकलाई आवास कर्जा
प्रधानसेनापति शर्माले सेनामा १० वर्ष वा सोभन्दा बढी अवधि सेवा गरेका सकलदर्जाहरूलाई आवास निर्माणका लागि सहुलियतपूर्ण ब्याजदरमा २५ लाखसम्म आवास कर्जा उपलब्ध गराउने घोषणा गरेका छन् । कल्याणकारी यातायात सुविधा प्रदान गर्न बहालवाला सकलदर्जाहरूलाई वर्षमा एकपटक घरबिदा जाँदा निःशुल्क यातायात सुविधा उपलब्ध गराउने पनि बताएका छन् ।
६० वर्ष उमेर पुगेका भूपू सैनिक तथा पारिवारिक निवृत्तिभरणमा रहेकाहरूलाई वार्षिक रूपमा दिँदै आएको पाँच हजार रुपैयाँमा वृद्धि गरी १ असोजदेखि १२ हजार रुपैयाँ उपलब्ध गराउने प्रधानसेनापति शर्माले घोषणा गरेका छन् । त्यस्तै, द्वन्द्वमा वीरगति प्राप्त गर्ने तथा कर्तव्यपालनाको सिलसिलामा मृत्यु हुने सकलदर्जाका पारिवारिक निवृत्तिभरणमा रहेका करिब आठ सय एकल महिलाको निवृत्तिभरण रकममा मासिक पाँच सय थप गरेर क्रमशः तीन हजार पाँच सय र दुई हजार पाँच सय उपलब्ध गराउने बताएका छन् । द्वन्द्वमा घाइते तथा अपांगता भएका सकलदर्जालाई चारपांग्रे स्कुटर उपलब्ध गराउने घोषणा पनि गरेका छन् ।
छात्रवृत्ति कोटा बढ्यो
प्रधानसेनापति शर्माले सैनिक कमान्ड तथा स्टाफ तालिमको शिक्षार्थी कोटा पुनरावलोकन गरी ५७ बाट ७७ पु¥याउने उद्घोष गरेका छन् । ‘अन्य सुरक्षा निकायको हकमा तीनवटा र विभिन्न मित्रराष्ट्रहरूका लागि राखिएको १२ वटा कोटा यथावत् राखिनेछ । यसरी कोटा थप गरेपछि कमान्ड तथा स्टाफ तालिमको अधिकतम् शिक्षार्थी संख्या ९२ कायम हुनेछ,’ शर्माले भने ।
फास्ट ट्र्याक सम्पन्न गर्न विशेष पहल
प्रधानसेनापति शर्माले रणनीतिक दृष्टिकोणबाट महत्वपूर्ण मानिएको राष्ट्रिय गौरवको आयोजना काठमाडौं–तराई–मधेस द्रुतमार्ग निर्माण कार्य समयमै सम्पन्न गर्न प्रयास गर्ने बताए । ‘निर्धारित समयमा सम्पन्न गर्न विशेष पहल गरिनेछ । त्यसैगरी, नेपाली सेनालाई जिम्मेवारी प्राप्त अन्य महत्वपूर्ण करिडोर निर्माणका कार्यहरूलाई पनि समयमै सम्पन्न गरिनेछ,’ उनले भने । उनले संयुक्त राष्ट्रसंघीय मिसनमा नेपाली सेनाको गुणात्मक सहभागिता वृद्धि गर्दै लैजाने पनि बताए ।