सर्लाहीको बसवरियामा करेन्ट लागेर एक पुजारीको मृत्यु भएको छ । बसवरिया गाउँपालिका– ६, सोहडवास्थित राम जानकी मन्दिरका पुजारी अन्दाजी ६० वर्षीय किशोरी दास बैरागीको करेन्ट लागेर मृत्यु भएको हो । मन्दिरको बरन्डामा भजनकीर्तनका लागि माइकमा तार जोड्ने क्रममा उनलाई करेन्ट लागेको प्रत्यक्षदर्शीको भनाइ छ ।
करेन्ट लागेलगत्तै स्थानीयले प्रहरीलाई खबर गरेका थिए । पुजारी दासको घटनास्थमै ज्यान गएको प्रहरीले जनाएको छ । उनको शव आफन्तको जिम्मा लगाइएको छ । जिल्लाको विष्णु गाउँपालिका– ८, बक्रौल घर भएका दास विगत ४५ वर्षदेखि उक्त मन्दिरमा पुजारीको रूपमा रहँदै आएका थिए ।
घटनाको थप अनुसन्धान भइरहेको जिल्ला प्रहरीका सूचना अधिकारी एवं प्रहरी निरीक्षक कृष्ण गिरीले जानकारी दिए ।