जनता समाजवादी पार्टी (जसपा)को महन्थ ठकुर पक्षबाट केपी ओली सरकारमा मन्त्री बनेकी रेनुका गुरुङले कित्ता परिवर्तन गरेकी छिन्।  गुरुङ ओली सरकारमा महिला, बालबालिका तथा ज्येष्ठ नागरिक राज्यमन्त्री बनेकी थिइन्। उनी उपेन्द्र यादव- बाबुराम भट्टराई पक्षले बोलाएको संसदीय दलको बैठकमा सहभागी भएकी हुन्। 

यसअघि ठाकुर पक्षका पाँच सांसद उपेन्द्र यादव पक्षको संसदीय दलको बैठकमा सहभागी भएका थिए।  शनिबार पार्टी कार्यालय बालकुमारीमा बसेको जसपा संसदीय दलको अनौपचारिक बैठकमा ठाकुर पक्ष छोडेर प्रमोद साह, अमृता अग्रहरि, रानी मण्डल, नरमाया ढकाल र रुहिनाज सहभागी भएका थिए। उनीहरूसँगै गुरुङ पनि थपिएकी हुन्। उनीहरू आफ्नो पक्षमा आएपछि संसदीय दलमा बहुमत पुगेको उपेन्द्र-बाबुराम पक्षको दाबी छ।

ठाकुर पक्ष केपी ओली सरकारमा सहभागी भएपछि जसपामा विभाजनको सँघारमा पुगेको थियो। जसपा विवादबारे निर्वाचन आयोगले इजलास गठन गरेको छ। आजदेखि आयोगको इजलास सुरु भएको छ।