अस्ट्रेलियाको सिमाना खुला गर्न हतार छैन : व्यापारमन्त्री
अस्ट्रेलियाले अन्तर्राष्ट्रिय सिमाना तत्काल खुला नगर्ने संकेत गरेको छ । अस्ट्रेलियाका व्यापारमन्त्री डान टेहानले अन्तर्राष्ट्रिय सिमाना तत्काल खुला गर्न अस्ट्रेलियालाई हतार नभएको स्पष्ट पारेका छन् ।
सिमाना खुला गर्नु कति ठीक र कति बेठीक भन्ने विषयमा सरोकारवाला र विज्ञहरूसँग परामर्श तथा छलफलहरू भइरहेको उनले बताए ।
सिमाना अहिले नै खुला गर्न हतार गर्न नहुने सुझाब अधिकांश विज्ञ तथा सरोकारवालाहरूले दिएकाले अझै केही समय सिमाना नखुल्ने उनले स्पष्ट पारे । विशेष सेवा र अवस्थाका लागि भने निर्धारित सर्तहरू पूरा गरेर हवाई यात्रुहरूलाई भने अस्ट्रेलियाले आवतजावत गर्न दिएको छ ।
न्युजिल्यान्ड र अस्ट्रेलियाका बीचमा हवाई सेवा गत अप्रिलदेखि खुला गरिएको छ । तर, सबै देश तथा क्षेत्रलाई अस्ट्रेलियासँगको सिमाना खुला गर्न भने अस्वीकार गरिएको छ ।
कोरोना भाइरसको महामारी अझै पनि खतरामुक्त अवस्थामा नरहेकाले सिमाना खोल्ने जोखिम लिन नचाहेको व्यापारमन्त्री टेहानले बताए ।