कांग्रेस सभापति शेरबहादुर देउवाले बाढी-पहिरोमा परेका जनतालाई तत्काल उद्धार र राहतको व्यवस्था गर्न सरकारसँग माग गरेका छन् । सभापति देउवाले विपद्का कारण सिर्जित संकटमा उद्धार र राहतका लागि खटिन नेता कार्यकर्ताहरुलाई निर्देशन समेत गरेका छन् ।
केही दिनदेखि परेको अविरल वर्षाका कारण सिन्धुपाल्चोक, मनाङ लगायत देशका बिभिन्न ठाउँमा बाढी, पहिरो र कटानले विकराल रुप लिएको छ । बुधबार बिहानै सामाजिक सञ्जालमार्फत् सभापति देउवाले विपदमा परेका जनतालाई तत्काल उद्धार गरेर सुरक्षित स्थानमा स्थानान्तरण गर्न समेत माग गरेका छन् ।
‘केही दिनदेखि परेको अविरल बर्षाका कारण सिन्धुपाल्चोक, मनाङ लगायत देशका विभिन्न क्षेत्रमा बाढी, पहिरो र कटानले विकराल रुप लिएको छ । यो कठिन अवस्थामा नेपाली कांग्रेसका नेता तथा कार्यकर्ताहरुलाई तत्काल आ-आफ्नो क्षेत्रमा उद्धार र राहतमा खटिन निर्देशन गर्दछु,’ देउवाले भनेका छन्, ‘सरकारलाई तत्काल विपदमा परेका जनतालाई उद्धार गरेर सुरक्षित स्थानमा स्थानान्तरण गर्न र उनीहरुलाई आवश्यकक राहत प्याकेज घोषणा गर्न माग गर्दछु।’