सरकारले निषेधाज्ञा जारी गरेपछि लमजुङको मर्स्याङ्दी गाउँपालिकामा कृषकले लगाएको तरकारी बारीमै कुहिन थालेको छ । ऋण गरेर लगाएको तरकारीबाली निषेधाज्ञाका कारण बजारसम्म पुर्याउन नपाउँदा बारीमै कुहिन थालेको हो ।
मर्स्याङ्दी गाउँपालिकाका किसान अमृत भण्डारीले ३ रोपनी जग्गामा लगाएको ५० क्वीन्टल बन्दा विक्री नहुँदा बारीमै कुहिएको बताए । बारीको तरकारी बजारसम्म लैजान नपाउँदा कुहिएर खेर गएको भण्डारीको भनाई छ ।
उनले भने ‘होटलहरु बन्द हुँदा बन्दा बारीमै कुहिन थाल्यो बेच्न लैजाउ बजारमा किन्ने मान्छे छैनन्’ उनले गुनासो गरे । निषेधाज्ञामा दुई लाख क्षति भएको उनको भनाइ छ । यस्तै मर्स्याङ्दी गाउँपालिका ५ घेर्मुका खड्ग जंग गुरुङले पनि निषेधाज्ञाका कारण तरकारी बेच्न नपाएको गुनासो गरे । उनले भने ‘६ क्विन्टल बन्दा विक्री नहुँदा बारीमै कुिहएको छ ।’
उनीहरु त प्रतिनिधि पात्र मात्रै हुन् । ऋण लिएर तरकारी खेती गरिरहेका कृषकहरूले आफूले उब्जाएको तरकारी बजारसम्म पुर्याउन नपाउँदा धेरै नोक्सानी व्यहोरेका छन् ।
कृषकहरू आफुले उत्पादन गरेको तरकारी बेच्न नपाउँदा ठूलो क्षति व्यहोर्न बाध्य छन् । स्थानीय प्रशासनले बिहान ६ बजेदेखि ९ बजेसम्म खोल्न र तरकारी बेच्न पाइने भनेको छ । मर्स्याङ्दी बहुउदेशीय कृषि सहकारीका अध्यक्ष विरेन्द्र बहादुर भण्डारीले होटल व्यवसाय सञ्चलान नहुँदा बन्दा विक्री नभएको बताए ।