राष्ट्रिय मानव अधिकार आयोगले सुर्खेतमा राउटे समुदायकी युवतीमाथि दुर्व्यवहार गर्नेलाई अनुसन्धान गरी कारबाहीको दायरामा ल्याउन राष्ट्रिय मानव अधिकार आयोगले अनुरोध गरेको छ । सुर्खेतको गुर्भाकोट नगरपालिका– ९ का युवाहरूले स्थानीय राउटे समुदायका युवतीहरूलाई प्रलोभनमा पारी मदिरा सेवन गराई यौन दुर्व्यवहार गरेको समाचारप्रति गम्भीर ध्यानाकर्षण भएको राष्ट्रिय मानव अधिकार आयोगले जनाएको छ ।
आयोगको कर्णाली प्रदेश शाखा कार्यालय जुम्लाले यस सम्बन्धमा अनुगमन गरेकोसमेत जनाएको छ । स्थानीय तीनजना युवाले राउटे समुदायका दुईजना युवतीलाई प्रलोभनमा पारी स्थानीय होटेलमा लगेर यौनजन्य कार्य गर्न बाध्य बनाएको, उक्त घटनाका कारण निज युवतीलाई राउटे समुदायले अस्वीकार गर्ने सम्भावना देखिएको र उनीहरूको ज्यान नै जोखिममा पर्न सक्ने अनुगमनबाट पाइएको आयोगको भनाइ छ ।
प्रलोभनमा पारी यौन हिंसामा लगाइएका उल्लेखित दुई युवतीलाई यसअघि पनि राउटे मुखियाले चार महिना नजरबन्दजस्तै गरी बन्दी बनाइएको जानकारीसमेत प्राप्त भएको आयोगद्वारा जारी विज्ञप्तिमा उल्लेख छ ।
पीडित युवतीहरूको गोपनीयताको संरक्षण गर्दै तत्काल स्वास्थ्य परीक्षण गर्न, उनीहरूको भौतिक सुरक्षा गरी जीवनको अधिकार संरक्षणमा तत्काल आवश्यक पहल गर्न र प्रभावकारी अनुसन्धानमार्फत दोषीलाई कानुनी कारबाहीको दायरामा ल्याउन आयोगले सरकारसँग आग्रह गरेको छ ।