कांग्रेस नेता प्रकाशमान सिंहले राष्ट्रपति र प्रधानमन्त्रीबाट संविधान र लोकतन्त्रमाथि भएको प्रहारलाई नेपाली जनताले क्षमा नगर्ने बताएका छन् । उनले जनताले पाँच वर्षका लागि निर्वाचित गरेको संसद भङ्ग गरेर यो महामारीका बेला जनताको जीवन बचाउन होइन, मत माग्न जाऊ भन्नु निकृष्ट कार्य भएको टिप्पणी गरेका छन् ।

‘जनताले ५ वर्षका लागि निर्वाचित गरेको संसद भंग गरेर यो महामारीको बेलामा जनताको जीवन बचाउन होइन, मत माग्न जाउँ भन्नू कुन मानवीयताले दिनसक्छ । यो निकृष्ट कर्म हो । प्रधानमन्त्री र राष्ट्रपतिको योजनाबद्ध षडयन्त्रबाट संसद माथि प्रहार गरेर संविधान, लोकतन्त्र र परिवर्तनका एजेन्डाहरूलाई समाप्त गर्न खोजिएको घटनाको जति भत्सर्ना गरेपनि कम नै हुन्छ,’ नेता सिंहले फेसबुकमार्फत भनेका छन्, ‘देशले कसैको सनक र अंहकारको मूल्य चुकाउन सक्दैन । मध्यरातमा चालिएको असंवैधानिक कदमको म घाेर भर्त्सना गर्दछु ।'