नेकपा एमाले संसदीय दलका प्रमुख सचेतक विशाल भट्टराईले प्रधानमन्त्री केपी ओलीले विश्वासको मत नपाए प्रतिपक्षमा बस्ने बताएका छन् । आइतबार संघीय संसद् भवन नयाँ बानेश्वरमा सञ्चारकर्मीलाई प्रतिक्रिया दिँदै उनले पार्टीभित्र ह्विप लाग्ने र सांसदहरूले मान्नैपर्ने बताए । 

एमालेका कुनै पनि सांसदले विपक्षमा मत हाल्ने सम्भावना नरहेको उनको दाबी छ । उनले अन्य पार्टीलाई आफूहरूको ह्विप नलाग्ने पनि बताए । 

उनले भने, ‘०७४ सालको निर्वाचनमा नेकपा एमालेले जम्मा एक सय २१ सिट जितेको हो । त्यो एक सय २१ सिट संख्या यसपटक प्रधानमन्त्रीको विश्वासको मतको पक्षमा उभिन्छ । बाँकी राजनीतिक दलहरूसँग हामीले सहयोग माग्ने मात्रै हो । अरू दललाई हाम्रो ह्विप लाग्दैन । निर्देशन लाग्दैन । प्रधानमन्त्रीले सबैलाई आग्रह गर्नुभएको छ । यदि विश्वासको मत प्राप्त भएन भने विपक्षमा बसेर हामी मुलुक र जनताको सेवा गर्न तत्पर छौँ ।’

उनले एमालेकै नेपाल–खनाल समूहले प्रधानमन्त्रीले विश्वासको मत लिन प्रस्ताव पेस गर्नुअगावै राजीनामा दिने कुरामा आफूलाई विश्वास नभएको तर्क गरे । उनले भने, ‘मलाई पटक्कै विश्वास छैन । किनभने निर्वाचनमा पाँच वर्षका लागि मत मागेर आउनुभयो । विकास र समृद्धिको कुरा गर्नुभयो । यसवेला आएर जनताका बीचमा राजीनामा दिएर के भन्दै जाने हो । त्यसकारणले मलाई राजीनामा आउँछजस्तो लागेको छैन ।’