मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेश
  • वि.सं २०७९ माघ १५ आइतबार
  • Sunday, 29 January, 2023
२०७८ बैशाख २५ शनिबार १०:२०:००
Read Time : > 2 मिनेट
खेलकुद प्रिन्ट संस्करण

चितवन एनएसएलबाट बाहिरिने पहिलो टोली

Read Time : > 2 मिनेट
२०७८ बैशाख २५ शनिबार १०:२०:००

खेलको अन्तिम आठ मिनेट १० जनामा सीमित भएको चितवनले त्यसपछि दुई गोल व्यहोर्दै पराजय व्यहोरेको हो 

एफसी चितवन नेपाल सुपर लिग (एनएसएल)बाट बाहिरिने पहिलो टोली बनेको छ । शुक्रबार भएको खेलमा पोखरा थन्डर्ससँग २–१ गोलको पराजय व्यहोर्दै चितवन पहिलो संस्करणको एनएसएल उपाधि होडबाट बाहिरिएको हो । चितवनले प्रतियोगिताको लिग चरणमा अझै एक खेल खेल्न बाँकी छ । यद्यपि, काठमाडौं रेजर्सविरुद्ध हुने उक्त खेलमा जित हात पारेर पनि चितवनका लागि प्रतियोगिताको अन्तिम चारको यात्रा सम्भव हुनेछैन । लिग चरणको खेलपश्चात् शीर्ष चार स्थानमा रहने टोलीले उपाधिका लागि प्रतिस्पर्धा गर्नेछन् । 

प्रतियोगितामा पाँच खेल खेलिसक्दा चितवन अझै जितविहीन छ । चितवन प्रतियोगिताको एक्लो जितविहीन टोली हो । उसले दुई खेलमा बराबरी खेलेको छ भने तीन खेलमा पराजय व्यहोरेको छ । दुई अंक मात्रै जोडेको चितवन सात टोली सहभागी एनएसएल अंक तालिकाको पुछारमा छ ।

उपाधि होडबाट बाहिरिएपछि चितवनका सहायक प्रशिक्षक शैलेश कर्माचार्यले दुःख व्यक्त गरे । ‘उपाधि होडमा कायम रहन हामीलाई आजको खेलमा जित आवश्यक थियो । हामीलाई बराबरीको नतिजाले पनि हुने थिएन, जित नै चाहिने थियो,’ उनले भने, ‘हामीले त्यहीअनुसारको योजना बनाएका थियौँ । यद्यपि, योजना सफल भएन ।’ चितवनलाई पराजित गरेको पोखराको भने प्लेअफ सम्भावना जीवितै रहेको छ । यद्यपि, पोखरालाई त्यसका लागि अब अन्य टोलीको खेलमा निर्भर पर्नुपर्नेछ । पोखरा ६ खेलबाट दुई जित र दुई बराबरीसँगै आठ अंकका साथ अंक तालिकाको तेस्रो स्थानमा उक्लिएको हो । 

एक गल्तीमा डुबेको चितवनको भाग्य
चितवनलाई आफ्नो उपाधि आशा जीवित राख्न पोखराविरुद्धको खेलमा कुनै पनि अवस्थामा जित आवश्यक थियो । उसले सुरुवातबाटै त्यहीअनुसार खेल्यो पनि । पोखराको पोस्टमा नियमित आक्रमण गरेको चितवनले खेलको ७३औँ मिनेटमा १–० को अग्रता पनि बनाएको थियो । विपक्षी खेलाडीले फर्काएको बललाई शिशिर लेखीले डी बक्सको दायाँतर्फबाट सशक्त प्रहार गरेको बल पोखराका गोलरक्षक दीप कार्कीलाई समेत नाघेर गोलमा परिणत भएको थियो । 

त्यही गोलसँगै चितवन बहुप्रतीक्षित जिततर्फ अग्रसर देखिएको थियो । तर, खेलमा ८२औँ मिनेटपछि एउटा ‘टर्न’ आयो, जसले चितवनको पक्षमा देखिएको जित पोखराको पोल्टामा पारिदियो । त्यस वेला चितवनका गोलरक्षक विशाल सुनार ठूलो गल्ती गर्न पुगे । उनले आफूतर्फ आइरहेको बललाई क्लियर गर्ने प्रयासमा डी बक्स लाइनभन्दा केही बाहिर निस्किएर हातले छोएका थिए । 

त्यही गल्तीमा रेफ्री प्रज्वल क्षेत्रीले विशाललाई सीधै रातो कार्डमा मैदानबाट बाहिर मात्रै पठाएनन्, पोखरालाई डी बक्स लाइनकै छेउबाट फ्री किक अवसरसमेत दिए । त्यही फ्री किकमा गोल गर्दै कप्तान नवयुग श्रेष्ठले खेलको ८६औँ मिनेटमा पोखरालाई १–१ को बराबरीमा फर्काए । १० जनामा सीमित भएको चितवनविरुद्ध पोखराले थप आक्रमण बढायो । फलस्वरूप ६ मिनेट थप गरिएको अन्तिम इन्जुरी समयको चौथो मिनेटमा अफ्रिकी खेलाडी राफेल रिम्गागोले गोल गर्दै पोखराको जित २–१ ले निश्चित गरेका थिए ।

त्यसअघि दुवै टोलीका केही राम्रा अवसर खेर गएको थियो । खेलको १५औँ मिनेटमै चितवनका सुनील श्रेष्ठले सिक्स यार्ड बक्स नजिकबाट गरेको सशक्त प्रहारलाई पोखराका गोलरक्षक दीप कार्कीले उत्कृष्ट बचाउ गरेका थिए । खेलको ५९औँ मिनेटमा चितवनका जर्ज प्रिन्स कार्कीको अर्काे सशक्त प्रहारलाई पोखराका गोलरक्षक दीपले नै मुस्किलले नियन्त्रणमा लिएका थिए । खेलको ६८औँ मिनेटमा पोखराका मौसा अब्बाले एउटा राम्रो अवसर गुमाए । 

चलाखीपूर्ण तरिकाले चितवनको अफसाइड ट्र्यापलाई विफल तुल्याउँदै बल अघि बढाएका अब्बाले आफैँले प्रहार गर्नुपर्ने बल चितवनका गोलरक्षक विशालसँगको वान भर्सेस वानको अवस्थामा पुगेपछि क्रस गरिदिए ।

उक्त क्रसलाई सदुपयोग गर्न उनका सहकर्मी ठाउँमा थिएनन् । खेलको ७०औँ मिनेटमा रूपबहादुर लामाले झन्डै २० यार्ड दूरीबाट गरेको सशक्त प्रहार क्रस बारमा लागेर फर्किँदा चितवन गोलबाट चुकेको थियो । खेलको ८८औँ मिनेटमा पोखराका राजेश परियाले डी बक्सबाहिरबाट गरेको प्रहार पनि दोस्रो बारमा लागेर फर्किएको थियो । खेलपछि पोखराका सहायक प्रशिक्षक राजेश शाहीले टोलीको जितमा खुसी व्यक्त गरे । ‘धेरै पछि जित प्राप्त भएको छ । खुसी छु,’ उनले भने, ‘खेलाडीहरूले गरेको मिहिनेत देखिएको छ ।’