गण्डकी प्रदेश सभामा एमाले सांसद कृष्णबहादुर थापाले कोरोना महामारीको वेला मुख्यमन्त्रीविरुद्ध ल्याइएको अविश्वासको प्रस्ताव कात्रो बनेर आएको टिप्पणी गरेका छन् । बुधबार बसेको प्रदेश सभा बैठकमा सांसद थापाले कोरोनाको समयमा आइसोलेसन र भेन्टिलेटरको विषयमा छलफल गर्नुपर्ने ठाउँमा अविश्वासको प्रस्तावमाथि छलफल गर्नु दुःखद भएको बताए ।
मुख्यमन्त्रीविरुद्ध ल्याइएको अविश्वासको प्रस्ताव गण्डकी प्रदेशका जनताको अभिमतको विरुद्ध भएको उल्लेख गरे । मुख्यमन्त्रीविरुद्ध अविश्वासको प्रस्ताव ल्याएर नयाँ गठबन्धन बनाइएकोप्रति आक्रोशित हुँदै थापाले भने, ‘यो गठबन्धन फाटेको धोतीजस्तै हो । जुनसुकै वेला च्यातिन सक्छ ।’
राजनीतिक अस्थिरता फैलाउन अविश्वासको प्रस्ताव आएको थापाले बताए । उनले मुख्यमन्त्रीमाथि भएको षड्यन्त्र धेरै दिन टिक्न नसक्ने दाबी गरे ।