काठमाडौं उपत्यकाका प्रमुख जिल्ला अधिकारीहरूले एक साता निषेधाज्ञा वा लकडाउन गर्न सिफारिस गरेका छन् । उपत्यकाका तीनवटै जिल्लाका प्रमुख जिल्ला अधिकारीहरूको सोमबारको संयुक्त बैठकले कम्तीमा दुई दिनको समय दिएर एक साताका लागि काठमाडौं उपत्यकामा निषेधाज्ञा वा लकडाउन गर्न गृह मन्त्रालयलाई सिफारिस गरेको हो ।
निषेधाज्ञा वा लकडाउन गर्नुपूर्व नागरिकलाई आफ्नो घर जान दुई दिनको समय दिने भएको छ । काठमाडौंका प्रमुख जिल्ला अधिकारी कालीप्रसाद पराजुलीले कोभिड संक्रमणको स्थिति गम्भीर देखिएकाले कम्तीमा एक साता निषेधाज्ञा अथवा लकडाउन हुने र त्योभन्दा अगाडि दुई दिनको समय दिइने बताएका हुन् ।
कुनै एक क्षेत्रलाई मात्रै बन्द गर्दा पनि संक्रमणको अवस्थालाई ब्रेक गर्न नसकिने भएकाले सम्पूर्ण क्षेत्रलाई पूर्ण रूपमा बन्द गराउन निषेधाज्ञा आवश्यक रहेको निर्णय भएको उनले बताए ।
लकडाउन गर्नुभन्दा अगाडि सतर्क रहन सर्वसाधारणलाई अपिल गरिएको भए पनि मापदण्ड पूर्ण रूपमा पालना नहुँदा संक्रमणको स्थिति गम्भीर बनेको ठहर प्रशासनको छ । त्यसैले थप भयावह स्थिति आउन नदिन निषेधाज्ञा आवश्यक रहेको पराजुलीले बताए ।