जिल्लाबाट चालु बर्ष ५२ मेट्रिक टन मकैको बिऊ निर्यात भएको छ । जिल्लाको विभिन्न ठाउँबाट २४ लाख ५६ हजार ९ सय १५ रुपैयाँ बराबरको मकैको उन्नत जातको बिऊ निर्यात भएको हो ।
किसानका लागि उन्नत बिऊ बिजन कार्यक्रमको अनुदानमा जिल्लाको मुसीकोट नगरपालिका, चौरजहारी नगरपालिका, बाँफिकोट गाउँपालिका र त्रिवेणी गाउँपालिकाका १९ वटा कृषि समुह तथा सहकारीले उक्त बिऊ उत्पादन गरेका कृषि उद्यम केन्द्रका जिल्ला कृषि ब्यवसायी विकास सल्लाहकार राजु लामिछानेले जानकारी दिए । यो सिजनामा मात्र मकैको बिऊबाट कृषकहरुले साढे २४ लाख आम्दानी गरेको उनले बताए ।
गत वर्ष किसान र बिऊ कम्पनीबिच भएको सम्झौता अनुसार मकैमो बिऊ बिक्री गरीएको उनले बताए । सम्झौता अनुसार रुकुमेली एग्रो सिड दाङ, पञ्जशक्ति बिऊ कम्पनी धनगढी, शाइकुमारी एग्रोभेट मुसीकोट र ओली सप्लायर्स खोलागाउँले जिल्लामा उत्पादित मकैको बिऊ खरिद गरेका हुन् । जिल्लामा किसानका लागि उन्नत बिऊ बिजन कार्यक्रमले ताजा तरकारी तथा खाद्यान्नको बिऊ उत्पादनका लागि कृषकहरुलाई विभिन्न सहयोग गर्दै आएको छ । मुल बिऊ, सिंचाई, कृषि उपकरण, तालिम, मल तथा बिषादी लगायतमा कृषकलाई अनुदान प्रदान गरिएको लामिछानेले बताए ।
उमार शक्ति ९६ प्रतिशत
बिऊ बिजन प्रयोगशाला खजुरामा गरिएको परिक्षण अनुसार उत्पादित मकैको बिऊमा राम्रो उमर शक्ति रहेको पाइएको छ । लामिछानेको अनुसार उक्त बिऊमा ९६ प्रतिशतसम्म उमार शक्ति रहेको परिक्षणबाट पत्ता लागेको हो ।
उमार शक्ति राम्रो भएकाले बिऊ खरिद गर्ने कम्पनीले किसानलाई राम्रो मुल्य दिएका छन् ।