चीनको केरुङबाट अबैध रूपमा ल्याइएको करिब आधा केजी सुनसहित एक जनालाई रसुवा प्रहरीले पक्राउ गरेको छ । पक्राउ पर्नेमा रसुवाको गोसाईकुण्ड गाउँपालिका १ थुमनका दावा छिरिङ तामाङ रहेका छन् ।
चीनको केरुङबाट काठमाडौं जाँदै गरेका तामाङलाई गोसाईकुण्ड गाउँपालिका ६ खोपाङभिरमा नियमित चेकजाँचको क्रममा सुनसहित पक्राउ गरिएको जल्ला प्रहरी कार्यालय रसुवाका प्रहरी निरीक्षक रञ्जन अवाले बताए । तामाङको शरीर जाँच गर्दा चार सय ६२ ग्राम सुन फेला पारिएको अवाले बताए ।
तामाङको साथबाट भेटिएको सुनको मुल्य २४ लाख ५९ हजार रुपैयाँ रहेको प्रहरीले जनाएको छ । सुनसहित पक्राउ परेका उनलाई आइतबार राजश्व अनुसन्धान विभागमा बुझाउने तयारी भइरहेको उनले बताए ।