एक महिनामा अमेरिकाको बजेट घाटा साढे १३ अर्ब डलर, करिब २२ ट्रिलियन डलर ऋण

अमेरिकी संघीय बजेट घाटा सन् २०१८ को डिसेम्बरमा साढे १३ अर्ब अमेरिकी डलर पुगेको अमेरिकी ट्रिजरी डिपार्टमेन्टले जनाएको छ ।

अघिल्लो वर्षको सोही महिनाको बजेट घाटामा ४० प्रतिशतको कमी आएको हो । अघिल्लो वर्षको डिसेम्बरमा संघीय घाटा बजेट करिब साढे २३ अर्ब अमेरिकी डलर रहेको थियो । अमेरिकाको सम्पूर्ण खर्चमा गत वर्षको तुलनामा चार प्रतिशतले कमी आएको छ भने अमेरिकाको सम्पूर्ण राजस्व संकलनमा गत वर्ष ६.६ प्रतिशतको कमी आएको छ । 

आर्थिक वर्ष २०१९ का लागि पहिलो तीन महिना, अक्टोबर, नोभेम्बर र डिसेम्बरमा बजेट घाटा तीन खर्ब १९ अर्ब अमेरिकी डलर रहेको देखिएको छ । यो अघिल्लो वर्षको सोही अवधिको तुलनामा ४२ प्रतिशतको बढी हो । 

नियमित तालिकाअनुसार उक्त तथ्याङ्क जनवरीको अन्त्यमा सार्वजनिक हुनु पर्नेमा ट्रम्प सरकार र संसदबीचको विवादका कारण सरकारी कार्यालयमा भएको ३५ दिन लामो बन्दका कारण ढिलो सार्वजनिक भएको हो । 

अमेरिकाको गत वर्षको डिसेम्बरमा उच्च तीन ठूला खर्चहरू, सामाजिक सुरक्षामा ८४ अर्ब अमेरिकी डलर, राष्ट्रिय सुरक्षामा ५७ अर्ब अमेरिकी डलर र स्वास्थ्यमा ४८ अर्ब अमेरिकी डलर रहेको तथ्याङ्कमा उल्लेख छ । अमेरिकाको सार्वजनिक ऋण फेब्रुअरी ११ सम्म करिब २२ ट्रिलियन डलर रहेको छ । यो अहिलेसम्मकै उच्च रेकर्ड हो । रासस