नेकपाका उपाध्यक्ष वामदेव गौतमले पार्टी कार्यालय धुम्बाराहीमा बैठक बोलाउन अध्यक्षद्वय केपी ओली र पुष्पकमल दाहाल ‘प्रचण्ड’लाई अनुरोध गरेका छन् । उनले बुधबार विज्ञप्ति जारी गर्दै सम्मानित सर्वोच्च अदालतले हजारौँ सपुतको बलिदान तथा लाखौँ देशभक्त नेपालीको त्याग र समर्पणबाट प्राप्त नेपालको संविधानको संरक्षण गरेको दिन भएकाे भन्दै नेपाल कम्युनिस्ट पार्टी (नेकपा)को उपाध्यक्षको हैसियतले दुवै अध्यक्ष केपी ओली र प्रचण्डसँग तुरुन्तै सचिवालय बैठक धुम्बाराहीस्थित केन्द्रीय कार्यालयमा बोलाउन अनुरोध गरेका हुन् ।
उनले विज्ञप्तिमा भनेका छन्, ‘प्रधानमन्त्री केपी ओलीले गत पस ५ गते गर्नुभएको प्रतिनिधिसभा विघटन असंवैधानिक ठहर भएको छ। आजको दिन निरंकुशता, स्वेच्छाचारिता, अराजकता र दुराचारीताको पराजय तथा संविधान, कानुन, लोकतन्त्र र जनताको सार्वभौमिकताले पुनर्विजय प्राप्त गरेको ऐतिहासिक दिन हो। यस अवसरमा म सर्वप्रथम प्रधानन्यायाधीश र संवैधानिक इजलासका न्यायाधीशहरूमा आभार प्रकट गर्दै उहाँहरूलाई हार्दिक धन्यवाद दिन्छु। ’
उनले राष्ट्रपतिले संवैधानिक इजलासको निर्णयलाई स्वागत गर्दै प्रतिनिधिसभा अधिवेशन आह्वान गर्नुपर्नेमा जोड दिएका छन् । साथै प्रधानमन्त्री ओलीले पदबाट राजीनामा दिनुपर्ने उनकाे भनाइ छ ।