- वि.सं २०८१ बैशाख १४ शुक्रबार
सत्ताधारी दल नेकपा ओली समूहले विराटनगरमा शक्ति प्रर्दशनसभा आयोजना गर्दै छ । विराटनगर महानगरपालिका २ मुनालपथमा रहेको खाली मैदानमा नेकपा ओली समूहले आज प्रदेश १ स्तरीय शक्त्ति प्रदर्शनसभा गर्न लागेको हो ।
प्रधानमन्त्री केपी ओलीले विशेष सम्बोधन गर्ने आजको सभाका लागि सभास्थलमा आकर्षक मञ्च निर्माण गरिएको छ ।
सभामा प्रदेशभरिबाट एक लाखभन्दा बढी कार्यकर्ता सहभागी हुने आयोजक नेकपा मोरङ ओली समूहकाे दाबी छ ।
सभालाई गृहमन्त्री रामबहादुर थापा, सुवासचन्द्र नेम्बाङ, प्रदेश १ का मुख्यमन्त्री शेरधन राईलगायतले सम्बोधन गर्ने आयोजकले जानकारी गराएका छन् । सभाअगाडि विराटनगरका विभिन्न क्षेत्रबाट र्याली प्रदर्शन गर्ने कार्यक्रम छ ।
सत्ताधारी दल नेकपा ओली समूहलाई समर्थन जुटाउन आयोजना गरिएको आजको शक्ति प्रदर्शनसभालाई सफल बनाउन युवाहरूले बिहीबार र शुक्रबार मोटरसाइकल र्याली मार्चपास कार्यक्रम सम्पन्न गरिसकेका छन् । प्रधानमन्त्री, गृहमन्त्री र मुख्यमन्त्री सहभागी हुने भएकाले विराटनगरमा सुरक्षा व्यवस्था कडा पारिएको छ ।
