कांग्रेस वरिष्ठ नेता रामचन्द्र पौडेल समूहले केन्द्रीय कार्यालयमा धर्ना दिने कार्यक्रम स्थगित गरेको छ । १४औँ महाधिवेशनको तयारीमा सभापति शेरबहादुर देउवाले चासो नदिएको भन्दै पौडेल समूहले बुधबार धर्ना दिने निर्णय गरेको थियो । 

सभापति देउवाले बुधबार नै केन्द्रीय समिति बैठक बोलाएपछि पौडेल समूहले धर्ना स्थगित गरेको हो । 

कांग्रेसले एक वर्षअघि नै आगामी ७ देखि १० फागुनसम्म केन्द्रीय महाधिवेशन गर्ने मिति तोकेको थियो । तर, अहिलेसम्म कुनै तयारी भएको छैन । पार्टीको वैधानिक कार्यकाल नै सकिने वेला भइसक्दासमेत सभापति देउवाले मिति तोक्ने विषयमै सकारात्मक चासो नदेखाएको भन्दै पौडेल समूहले दबाब दिने रणनीति अपनाएको थियो । 

पौडेल समूहका सबै केन्द्रीय सदस्य, सांसद, पूर्वसांसद र जिल्ला सभापतिहरूलाई धर्नामा सहभागी हुन आह्वान गरिएको थियो ।