लामो समयदेखि बढुवा हुन नसकेका जुनियर अधिकृतहरूको वृत्ति विकासका लागि नेपाल प्रहरीले नयाँ मापदण्ड बनाउने तयारी गरेको छ । यसबारे छलफल सुरु गरिएको प्रहरीले जनाएको छ । 

नयाँ मापदण्ड बने इन्स्पेक्टर र असइका रिक्त पदमा ६० प्रतिशत बढुवामार्फत र ४० प्रतिशत पदमा खुला प्रतिस्पर्धाबाट पदपूर्ति गरिनेछ । अहिले ६० प्रतिशत खुला प्रतिस्पर्धाबाट र ४० प्रतिशत बढुवा प्रक्रियाबाट पदपूर्ति गर्ने व्यवस्था छ । समयमै वृत्ति विकास नहुँदा प्रहरीका जुनियर अधिकृत १७ वर्षदेखि एउटै पदमा कार्यरत छन् । यही समस्याका कारण पछिल्लो ३० महिनामा सइभन्दा मुनिका पाँच हजार नौ सय ९७ कर्मचारीले राजीनामा दिएका छन् । 

नेपाल प्रहरी र सशस्त्र प्रहरीमा रहेको असन्तुलित वृत्ति विकासका विषयमा नयाँ पत्रिकाले आइतबार ‘प्रहरीको पीडा : ३० वर्ष जागिर, १७ वर्ष एउटै पद’ शीर्षकमा समाचार प्रकाशित गरेको थियो । नेपाल प्रहरीका प्रवक्ता एसएसपी वसन्त कुँवरले जुनियर प्रहरी अधिकृतको वृत्ति विकास गर्न नयाँ मापदण्ड बनाउनेबारे छलफल सुरु भएको बताए । 

‘जुनियर प्रहरी अधिकृतको वृत्ति विकास रोकिएको छ । यसले धेरै जुनियर प्रहरी अधिकृतको करिअरमा प्रभाव परेको छ । यो समस्या समाधान गर्न नेपाल प्रहरी लागेको छ । नयाँ मापदण्ड बनाउन छलफल चलाइएको छ,’ प्रवक्ता कुँवरले भने । उनका अनुसार नयाँ मापदण्ड बनेपछि जुनियर प्रहरी अधिकृतको वृत्ति विकाससम्बन्धी गुनासा केही हदसम्म समाधान हुनेछन् । 

आन्तरिक छलफलपछि प्रहरीले नेपाल प्रहरी नियमावली ०७१ संशोधन गर्न गृह मन्त्रालयमा प्रस्ताव लैजानेछ । कानुन र अर्थ मन्त्रालयले स्वीकृत दिएपछि नयाँ नियमावली लागू हुनेछ । 

साबिकको नियमावलीमा इन्स्पेक्टर र असइको पदपूर्ति ६० प्रतिशत खुला प्रतिस्पर्धा र ४० प्रतिशत बढुवामार्फत पदपूर्ति गर्ने व्यवस्था छ । अहिले इन्स्पेक्टरका सय दरबन्दी रिक्त छन् । ज्ब कि डेढ सयभन्दा धेरै सइ बढुवाका दाबेदार छन्, जो १५ वर्षभन्दा ‘जेठा’ सइ हुन् । तीमध्ये ३० जना त १७ वर्षदेखि सइमा कार्यरत छन् । बढुवा गरिने ४० जना छान्न प्रहरी नेतृत्वलाई हम्मे भएको छ । 

नेपाल प्रहरीमा झन्डै ८० हजार सुरक्षाकर्मीको दरबन्दी छ । तीमध्ये साढे ६ हजार दरबन्दी रिक्त छ । समयमै वृत्ति विकास नहुँदा जुनियर तहका धेरै प्रहरी अधिकृतले राजीनामा दिई सेवा छाडिरहेका छन् । प्रहरीकै तथ्यांकअनुसार पछिल्ला ३० महिनामा मात्रै ६ हजार ३८ कर्मचारीले राजीनामा दिएका छन् । त्यसमध्ये ९९.३२ प्रतिशत अर्थात् पाँच हजार नौ सय ९७ जना जुनियर तहका छन् । राजीनामा दिने सबैभन्दा धेरै प्रहरी हवल्दार छन्, उनीहरूको संख्या चार हजार एक सय ४४ रहेको छ । त्यस्तै, सात सय ६६ जवान, सात सय ४१ असइ र दुई सय १५ सइले राजीनामा दिएका छन् ।