कांग्रेस उपसभापति विमलेन्द्र निधिले कांग्रेस प्रतिनिधिसभा पुनर्स्थापनाको पक्षमा रहेको स्पष्ट पारेका छन् । प्रेस युनियन धनुषाले शनिबार आयोजना गरेको भेटघाट कार्यक्रममा उपसभापति निधिले कांग्रेसले प्रधानमन्त्री केपी ओलीले असंवैधानिक रूपमा प्रतिनिधिसभा विघटन गरेको दाबी गरे ।

नेकपाले कुनै पनि हालतमा मुलुकलाई सही नेतृत्व दिन नसक्ने उनको दाबी छ । बलियो सरकार हुँदाहुँदै पनि प्रधानमन्त्री ओलीले पार्टीको आन्तरिक कलहलाई समाधान गर्न नसकेर संविधानमै नभएको अधिकार प्रयोग गरी प्रतिनिधिसभा विघटन गरेको उनले जिकिर गरे । 

अदालतमा विचाराधीन विषयमा फैसला आए पनि कांग्रेस सोहीअनुसार अगाडि बढ्ने उनले बताए । निधिले भने ‘मुलुक जब–जब संकटमा पर्छ, त्यो वेला कांग्रेसले संकटमोचन गर्दै आएको छ । अहिलेको संकटमोचन पनि कांग्रेसले नै गर्छ ।’