संयुक्त राष्ट्रसंघका महासचिव गुटेर्रेसले लगाए कोरोना भाइरसविरुद्धको खोप
संयुक्त राष्ट्रसंघका महासचिव एन्टोनियो गुटेर्रेसले बिहीबार कोरोना भाइरसविरुद्ध खोपको पहिलो डोज लगाएका छन् । संयुक्त राष्ट्रको आधिकारिक वेबसाइटमा प्रकाशित रिपोर्टले सो कुराको जानकारी दिएको छ ।
गुटेर्रेसले ट्विटरमार्फत आफू भाग्यशाली र कृतज्ञ भएको बताउँदै सो खोप लगाएको पुष्टि गरेका छन् । साथै उनले अन्तर्राष्ट्रिय समुदायलाई भाइरसविरुद्धको खोप सबैका लागि यथोचित रूपमा उपलब्ध गराउन सुनिश्चित गर्नुपर्नेमा जोड दिएका छन् । ‘यस महामारीबाट हामी कोही पनि सुरक्षित छैनौँ, त्यसैले विश्वका जति देशलाई महामारीले सताएको छ, त्यहाँ खोप पुगोस् भनी कामना गर्दछौँ,’ गुटेर्रेसले लेखेका छन् । उमेरका आधारमा खोप लिन योग्य भएको पनि ७१ वर्षीय गुटेर्रेसले जनाएका छन् । न्युयोर्कका ६५ वर्षभन्दा माथिका बासिन्दालाई खोप अभियानको पहिलो चरणमा समावेश गरिएको छ ।
यस खोप अभियानमा विद्यालयका कर्मचारी पनि समावेश भएका छन् । सार्वजनिक ट्रान्जिटमा काम गर्नेहरू र किराना पसलमा काम गर्ने कामदारहरू पनि यो खोप अभियानमा समावेश गरिएको रिपोर्टले जनाएको छ ।
उनले गत महिना मात्र खोप लिने भनी घोषणा गरेका थिए । वृद्धवृद्धाका लागि खोप झन् असुरक्षित हुन्छ कि भन्ने त्रास हटाउन उनले खोप लिने घोषणा गरेका थिए ।