जिल्ला प्रहरी कार्यालय, कास्कीले क्यानडा पठाइदिन्छु भन्दै ठगी गर्ने एकजनालाई पक्राउ गरेको छ । बिहीबार प्रहरी कार्यालयमा पत्रकार सम्मेलन गर्दे क्यानडा पठाइदिने भन्दै ठगी गर्ने पर्वत मोदी गाउँपालिका– ७ स्थायी घर भई हाल पोखरा महानगरपालिका– ३० सिसुवा बस्ने ३८ वर्षीय धीरजकुमार विश्वकर्मालाई पक्राउ गरिएको जानकारी दिएको हो ।
पक्राउ परेका विश्वकर्माले ३३ जनावाट ९० लाख ७१ हजार पाँच सय ठगी गरेको जिल्ला प्रहरी कार्यालय कास्कीका प्रवक्ता प्रहरी नायव उपरीक्षक सुवास हमालले जानकारी दिए । आफू विगत लामो समयदेखि विदेश बसेको र युरोप, क्यानडा, अमेरिकालगायतका देशमा धेरै मानिस रोजगारका लागि पठाइसकेको भन्ने विश्वास दिलाई कास्की, स्याङ्जा, तनहुँ, म्याग्दीलगायतका जिल्लाका ३३ जनालाई क्यानडा पठाइदिने भन्दै उनले ठगी गरेको हमालको भनाइ छ ।
आरोपित विश्वकर्माले काम नगरेपछि उनलाई रकम दिएका ३३ जनाले दिएको निवेदनको आधारमा उनलाई पक्राउ गरिएको कार्यक्रममा उनले जानकारी दिए । पक्राउ परेका उनलाई ठगीसम्बन्धी कसुरअन्तर्गत मुद्दा दर्ता गरी थप अनुसन्धान प्रक्रिया अघि बढाइएको प्रहरीले जनाएको छ ।