प्रधानमन्त्री केपी ओलीले संसद् विघटनलाई असंवैधानिक भन्नेहरू देशविरोधी भएको बताएका छन् । आइतबार अपांगता भएका व्यक्तिहरूको समस्या र सवालमा अपांगतासँग सम्बन्धित विभिन्न संघसंगठनहरूले प्रधानमन्त्रीसँग गरेको साक्षात्कार कार्यक्रममा प्रधानमन्त्री ओलीले संसद् विघटनलाई असंवैधानिक भनेर कराउनेहरू देशविरोधी भएको बताएका हुन् ।
असंवैधानिक भन्नेहरू संविधान तथा लोकतन्त्रको विरोधी भएको उनको भनाइ छ । संसद् पुनस्र्थापना गर्न चाहनेहरू देशमा अस्तव्यस्तता खडा गरी स्थिरता र स्थायित्व हुन नदिने तथा बहुमतको सरकार तोडेर जोरजाममा सरकार बनाउन खोजेको आरोप ओलीको छ ।
संसद् पाँचै वर्ष हुनका लागि सांसदहरूको जागिर नभएकाले सांसदको काम हेरेर जनतालाई पुरस्कृत तथा दण्ड गर्नका लागि ताजा जनादेशमा जानुपर्ने उनको भनाइ छ ।
आफूले शासक बन्ने गरी हातमा केही नराखेको भन्दै ओलीले जनतालाई निर्णय गर्न दिने कुरा तानाशाह नभएको बताए । ओलीले अपांगता भएका व्यक्तिहरूको साथमा सरकार रहेको बताए ।