कर्णाली प्रदेशका मुख्यमन्त्री महेन्द्रबहादुर शाहीले प्रधानमन्त्री केपी ओलीले संसद् विघटन गरेर संविधानको उल्लंघन गरेको बताएका छन् ।
गृहजिल्ला कालिकोटमा पुगेका मुख्यमन्त्री शाहीले बुधबार पत्रकार सम्मेलन गर्दै प्रधानमन्त्री ओलीले संविधानको उल्लंघन गरेका कारणले राष्ट्रिय जनआन्दोलन गर्ने बताएका हुन् ।
‘संसद् विघटन संविधानमा कल्पना गरिएको छैन,’ मुख्यमन्त्री शाहीले भने, ‘स्पष्ट बहुमत हुँदाहुँदै संसद् विघटन प्रधानमन्त्रीले किन गर्नुभयो ? यसको जवाफ जनताले चाहेका छन् ।’
प्रधानमन्त्रीबाट सही जवाफ नपाए जनताले जनआन्दोलन गर्ने र त्यसको नेतृत्व पार्टीले गर्ने मुख्यमन्त्री शाहीले बताए ।
‘प्रधानमन्त्रीले पार्टीका साथीहरूले असहयोग गर्नुभयो त्यही भएर संसद् विघटन गरेको भनेर भन्नुहुन्छ,’ उनले भने, ‘उहाँ बालुवाटारबाहिर निस्कनु नै भएको छैन् । कहाँ असहयोग भयो उहाँले त्यो भन्नुपऱ्याे । उहाँले सहयोग नै पार्टीसँग माग्नुभएन कसरी असहयोग भयो ?’
प्रधानमन्त्रीले ओलीले संसद् विघटन गरेर ठूलो गल्ती गरेको मुख्यमन्त्री शाहीले बताए ।
‘प्रधानमन्त्रीले संविधानको बर्खिलाप गर्ने ?’ त्यसको बोझ नेपाली जनताले भोग्ने, पार्टीले भोग्नुपर्ने ?’ उनले भने, ‘यो अवस्था ल्याउने प्रधानमन्त्री स्वयं आफैँ हो ।’