संखुवासभाको चैनपुर नगरपालिका– ४ मैदानेमा प्रतिबन्धित नेत्रविक्रम चन्द (विप्लव) समूहले ओडारमा लुकाएर राखेको विस्फोटक पदार्थ प्रहरीले बरामद गरेको छ ।
सोमबार जिल्ला प्रहरी कार्यालय खाँदबारीमा विप्लव कार्यकर्ताले लुकाएर राखेको विस्फोटक पदार्थहरू पत्रकार सम्मेलन गरी सार्वजनिक गरेको हो ।
प्रहरीले विप्लव समूहले जंगलमा प्रयोग गर्दै आएको टेन्ट दुई थान, जिलेटिन ५० थान, डेटोनेटर ३० थान, सकेट बम चार थान, हतियार तथा कम्ब्याटसहितको जिल्ला इन्चार्ज उत्तरकुमार भनिने युवराज राईको फोटो ६ वटा र ११ वटा मोबाइल सेट, पाँच थान एनटिसी र एनसिएलको एउटा सिम, टर्चलाइट, कैँची, लाइटर, स्लिपिङ ब्याग, त्रिपाल, सेफ्टी फ्युज, सैन्य प्रशिक्षणका दस्ताबेज र लत्ताकपडासमेत बरामद गरेको जनाएको छ ।
विप्लव समूहका कार्यकर्ताले चैनपुर– ४ को मैदानेस्थित जंगलको ओडारमा लुकाएर राखेको सामग्री बरामद गरेको थियो ।
आइतबार दिउँसो सवा ३ बजेतिर प्रहरी र विप्लव कार्यकर्ताबीच गोली हानाहान भएको संखुवासभाका प्रहरी नायब उपरीक्षक (डिएसपी) नवराज मल्लले जानकारी दिए ।
उनका अनुसार नेपाल प्रहरी र सशस्त्र प्रहरी बलको गस्ती टोलीमाथि फायरिङ गरेपछि जवाफी फायरिङ गर्नुपरेको प्रहरीको भनाइ छ ।
विप्लव समूहका जिल्ला इन्चार्ज युवराज राईलगायतका नेता, कार्यकर्ता मैदानेमा रहेको सूचनाका आधारमा नेपाल प्रहरी र सशस्त्र प्रहरीको टोली त्यहाँ पुगेको डिएसपी मल्लको भनाइ छ ।
सुरक्षाकर्मीले घेरा हाल्दा विप्लव समूहका कार्यकर्ता फायरिङ गर्दै भागेको र दुवै समूहबीच गोली हानाहान भए पनि कुनै पनि मानवीय क्षति नभएको डिएसपी मल्लले बताए ।
‘अहिले विप्लव समूहका कार्यकर्ता भागेको जंगल क्षेत्रमा सुरक्षाकर्मी परिचालन गरिएको छ । विप्लव समूहका कार्यकर्ताले ५–६ राउन्ड गोली चलाएका थिए । प्रहरीले १५ राउन्ड जवाफी गोली चलाएको थियो,’ डिएसपी मल्लले भने ।
अहिले सो ठाउँ र सम्भावित चेकपोस्टहरूमा नेपाल प्रहरीका इन्स्पेक्टरको कमान्डमा ३६ जना र सशस्त्र प्रहरीका तर्फबाट १० जनाको टोली खटाइएको छ ।
उक्त मैदानेक्षेत्रमा यसअघि पनि दुईपटक विप्लव कार्यकर्ता र प्रहरीबीच दोहोरो भिडन्त भएको थियो । त्यहाँ मानवीय क्षति भने नभएको प्रहरीको भनाइ छ ।