नेपाल कम्युनिस्ट पार्टी नेकपा प्रचण्ड–नेपाल समूहका स्थायी कमिटी सदस्य देव गुरुङले सर्वोच्च अदालतले प्रधानमन्त्री केपी ओलीको विपक्षमा आदेश दिएर संविधानको रक्षा गर्ने बताएका छन् । 

प्रधानमन्त्रीको कदमले संविधान नै खतरामा परेको भन्दै उनले आदालतप्रति आफूहरूको विश्वास रहेको बताए । 

सोमबार पोखरामा नेकपा प्रचण्ड–नेपाल समूहको गण्डकी प्रदेश समितिले आयोजना गरेको पत्रकार भेटघाट कार्यक्रममा बोल्दै उनले यस्तो धारणा राखेका हुन् । कथंकदाचित सर्वोच्चले ओलीको कदम सदर गरे देशमा संविधान मर्ने र जंगे शासन सुरु हुने विश्लेषण गरे । 

प्रधानमन्त्री केपी ओलीकाे तानाशाही र फासीवादी चिन्तन साम्राज्यवादीहरूका लागि ‘ढुंगो खोज्दा देउता मिलेजस्तो’ भएको भन्दै उनले ओलीलाई साम्राज्यवादीहरूले नै प्रयोग गरेको अर्थ्याए । 

‘प्रधानमन्त्री केपी ओलीको तानाशाही, फासीवादी र एकाधिकारवादी शैली साम्राज्यवादीहरूलाई ढुंगो खोज्दा देउता मिलेजस्तो भएको छ,’ उनले भने ।

साम्राज्यवादीहरूको इच्छापूर्ति गर्न कम्युनिस्ट पार्टी र उनीहरूको वर्चस्व रहेको संसद् ध्यस्त पार्नु थियो भन्दै उनले त्यसमा ओली प्रयोग भएको विश्लेषण सुनाए । गुरुङले प्रधानमन्त्री ओली संविधानका सबै प्रावधान ध्वस्त पार्न लागिपरेको आरोप लगाए । 

‘उहाँ संविधानका सबै प्रावधान ध्वस्त पर्ने प्रयासमा हुनुहुन्छ’ भन्दै उनले एकपछि अर्को कदम चाल्न प्रधानमन्त्रीले खोजिरहेको र चुनाव गराउने नियत नै नरहेको उल्लेख गरे ।

अर्का स्थायी कमिटी सदस्य देवेन्द्र पौडेलले प्रधानमन्त्री केपी ओलीले राज्यसत्ताको चरम दुरुपयोग गर्ने चाहना पूरा गर्न संसद् विघटन गरेकाे बताए ।