लमजुङको विकट गाउँ दूधपोखरीमा महायज्ञको रकमबाट एम्बुलेन्स खरिद गरिएको छ । दूधपोखरी सम्पर्क समाज चितवनले एम्बुलेन्सको व्यवस्था गरेको हो ।

जिल्लाकै विकट दूधपोखरी गाउँपालिका– २ विचौरमा गत वर्ष माघ १४ गतेदेखि २२ सम्म हिमाली पर्यटन प्रवर्द्धन क्षेत्र विकास धार्मिक धाम एवं एम्बुलेन्स खरिद तथा सञ्चालन सहयोगार्थका लागि महायज्ञ सञ्चालन गरिएको हो । 

समाजका अध्यक्ष होमनाथ न्यौपानेका अनुसार दूधपोखरीबाट चितवन, नवलपुर बसेकालाई समाजमा आबद्ध गराई सामाजिक कार्य गरिएको हो । न्यौपानेका अनुसार १० लाख ७२ हजार ६ सय ७० रुपैयाँमा  एम्बुलेन्स खरिद गरिएको हो । 

०७६ माघ १४ देखि २२ गतेसम्म सञ्चालन गरिएको महायज्ञमा ३७ लाख आठ हजार पाँच सय २४ रुपैयाँ रकम संकलन भएको थियो । यसअघि गाउँमा स्टेचर पनि अभाव हुने र उपचारमा लागि बोकेरै अस्पताल लैजान बाध्य नागरिक गाउँमै एम्बुलेन्स सेवा पाउने भएसँगै खुसी भएको समाजका सचिव प्रकाश दवाडीले बताए ।