दोलखाको शैलुङ गाउँपालिका- ७ फस्कुका वडाध्यक्ष प्रेम भनिने धावा वाङगेल लामाको कोरोना संक्रमणका कारण मृत्यु भएको छ ।
एक साताअघि निमोनियाको लक्षण देखिएपछि उपचारका लागि काठमाडौं लगिएका लामाको उपचारको क्रममा मृत्यु भएको हो । वडाध्यक्ष लामाको किस्ट मेडिकल कलेजमा मृत्यु भएको शैलुङ गाउँपालिकाका प्रमुख प्रशासकीय अधिकृत राजुप्रसाद साहले जानकारी दिए ।
वडाध्यक्ष लामालाई दुई साताअघि रुघाखोकी देखिएको थियो । उनले सुरुमा स्थानीय स्वास्थ्य संस्थामा उपचार गराए पनि अवस्था गम्भीर बन्दै गएपछि २१ मंसिरमा काठमाडौंको हेल्पिङह्यान्ड अस्पतालमा भर्ना गरिएको थियो ।
५६ वर्षीय लामाको दुई दिन हेल्पिङह्यान्डमा उपचार गराए पनि स्वास्थ्यमा सुधार नआएपछि उनलाई २३ मंसिरमा किस्ट मेडिकल कलेजमा भर्ना गरिएको पूर्वपर्यटनमन्त्रीसमेत रहेका नेकपाका नेता आनन्दप्रसाद पोखरेलले जानकारी दिए ।
वडाध्यक्ष लामाको हेल्पिङह्यान्ड अस्पतालले २१ मंसिरमा गरेको पिसिआर परीक्षण रिपोर्ट नेगेटिभ आए पनि किस्ट मेडिकल कलेजमा २३ मंसिरमा गरेको पिसिआर परिक्षणमा रिपोर्ट पजिटिभ आएको थियो ।
लामा तत्कालीन एमालेबाट निर्वाचित भएका हुन् ।