पूर्वमन्त्री गोकुलप्रसाद बाँस्कोटाले भाषणमा सुशासन भन्नेलाई व्यवहारमा पुष्टि गर्न आग्रह गरेका छन् ।
पनौती नगरपालिका– ८ स्थित भालेश्वर माध्यमिक विद्यालयको नवनिर्मित ३६ कोठे तीन भवन शिलान्यास कार्यक्रमलाई आज सम्बोधन गर्दै उनले भाषणमा सुशासनका ठूला कुरा गरेर सुशासन नहुने बताए । ‘भाषणमा ठूला कुरा गरेर हुँदैन, दोषी हो भने कारबाही गर्नुपर्छ, लोकतन्त्रमा कसैलाई उन्मुक्ति दिनुहुँदैन,’ उनले भने ।
नेकपाका केन्द्रीय सदस्यसमेत रहेका पूर्वमन्त्री बाँस्कोटाले वर्तमान सरकार सुशासन कायम राख्न उद्यत् रहेको बताए । ‘हामी सुशासन चाहन्छौँ, भाषणमा कुर्लने हाेइन, सुशासन व्यवहारमा पुष्टि गरेर देखाउनुस्,’ उनेले भने ।
यसअघि उनले विद्यालयमा स्थापित आइसिटी ल्याबको उद्घाटन गरेका थिए । कार्यक्रममा पूर्वराज्यमन्त्री रेशम लामा, प्रतिनिधिसभा सदस्य गंगाबहादुर दोङ, बागमती प्रदेश सभा सदस्यद्वय बसुन्धरा हुमागाईं र चन्द्र लामा, पनौती नगरप्रमुख भीम न्यौपाने र विद्यालय व्यवस्थापन समितिका अध्यक्ष राजेन्द्र केसीलगायतले शुभकामना व्यक्त गरेका थिए ।