ट्रम्पले हार स्वीकार नगरे पनि अमेरिकी राष्ट्रपतिको आधिकारिक ट्विटर खाता २० जनवरीमा बाइडेनलाई दिइने
अमेरिकी राष्ट्रपतिमा निर्वाचित जो बाइडेनलाई ट्विटरले आगामी २० जनवरीमा अमेरिकी राष्ट्रपतिको आधिकारिक ट्विटर खाता पोटस (प्रेसिडेन्स अफ यूएस वा पिओटियुएस) हस्तान्तरण गर्ने भएको छ । ट्विटरले अमेरिकी राष्ट्रपतिको शपथ लिएलगत्तै खाता हस्तान्तरण गर्ने जनाएको छ । राष्ट्रपति डोनाल्ड ट्रम्पले हार स्वीकार नगरिरहेको वेलामा ट्विटरको यस्तो भनाइ आएको हो ।
ट्विटरका अनुसार खाता हस्तान्तरण गर्ने वेलामा राष्ट्रपति ट्रम्पको समूह र राष्ट्रपति निर्वाचित बाइडेनको समूहबीच सूचना आदान–प्रदानको आवश्यकता पर्दैन । कम्पनीका अनुसार यस खाताबाट भएका सबै ट्विट संग्रह गरिनेछ र शपथग्रहणका दिन कुनै पनि ट्विटविनाको खाता हस्तान्तरण गरिनेछ । ट्विटरका प्रवक्ता निक पेसिलियोले भनेका छन्, ‘ट्विटरले २० जनवरी २०२१ मा ह्वाइटहाउसलाई आधिकारिक रूपमा हस्तान्तरण गर्ने गरी काम गरिरहेको छ ।’ राष्ट्रतिको जस्तै गरी उपराष्ट्रपतिको ट्विटर खाता पनि यसै गरी हस्तान्तरण गरिनेछ ।