भारतमा कोभिड संक्रमणमुक्त हुने दर ९३.५२ प्रतिशत
भारतमा केही दिनयता कोरोना भाइरसबाट संक्रमितको संख्यामा केही कमी आएको देखिए पनि पछिल्लो २४ घन्टामा फेरि संक्रमितको संख्या बढेर ४५ हजार पाँच सय ७६ पुगेको छ । भारतीय स्वास्थ्य तथा परिवार कल्याण मन्त्रालयका अनुसार पछिल्लो २४ घन्टामा यहाँ पाँच सय ८५ जनाको मृत्यु भएको छ । योसहित भारतमा संक्रमितमध्ये एक लाख ३१ हजार पाँच सय ७८ जनाको ज्यान गएको छ ।
भारतमा हालसम्म ८९ लाख ५८ हजारमा कोरोना संक्रमण पुष्टि भए पनि ८३ लाख ८३ हजार संक्रमणमुक्त भइसकेका छन् । संक्रमितको निको हुने दर निकै राम्रो रहेको भारतमा हाल चार लाख ४३ हजार व्यक्ति सक्रिय संक्रमित अवस्थामा छन् ।
मन्त्रालयका अनुसार १२ दिनदेखि भारतमा ५० हजारभन्दा कम व्यक्तिमा मात्र संक्रमण देखिएको छ । भारतमै सर्वाधिक असर परेको महाराष्ट्रमा ८१ हजार दुई सय सातजनामा सक्रिय संक्रमण रहेको छ भने केरलामा करिब ७० हजार र दिल्लीमा ४२ हजारमा संक्रमण यथावत् रहेको छ ।
भारतीय स्वास्थ्य अनुसन्धान परिषद्ले देशभर १२ करोड ८५ हजार नमुना परीक्षण गरेको जनाएको छ । परिषद्का अनुसार भारतमा कोरोना संक्रमणमुक्त हुने दरमा निरन्तर सुधार हुँदै हाल ९३.५२ प्रतिशत रहेको छ ।