राष्ट्रपति विद्यादेवी भण्डारीलाई भेट्न सत्तारुढ नेकपाका कार्यकारी अध्यक्ष पुष्पकमल दाहाल प्रचण्ड शीतलनिवास पुगेका छन् । पार्टीभित्र विवाद चुलिएका वेला प्रचण्ड शीतलनिवास गएका हुन् ।
विवाद बढ्दै जाँदा सचिवालय बैठकसमेत अन्योलमा परेको छ । यसअघि सचिवालयको बैठक बुधबार बस्ने गरी स्थगित भएको थियो ।
सचिवालय बैठकमा प्रचण्डले पेस गरेको राजनीतिक प्रस्ताव फिर्ता नलिएसम्म बैठक बस्न नसक्ने अर्का अध्यक्ष केपी ओली पक्षले बताएको छ भने बैठकबाटै अगाडि बढ्नुपर्ने अडान प्रचण्ड र वरिष्ठ नेता माधवकुमार नेपाल पक्षको छ ।
नेकपामा विवाद भएको वेला राष्ट्रपति भण्डारीले नेताहरूलाई शीतलनिवास बोलाउने गरेकी छिन् । पार्टीको विषयमा राष्ट्रपति भण्डारीकाे सक्रियता देखिएको भन्दै आलोचनासमेत हुने गरेको छ ।
यसअघि मंगलबार नै प्रचण्डसँग नेकपाका महासचिव विष्णु पौडेलले छलफल गरेका थिए ।