थपिएको समय पनि सकियो, सडक निर्माण सकिएन

मेचीकै प्रमुख व्यापारिक केन्द्र बिर्तामोडको मुक्ति चोकदेखि हर्चना कल्भर्टसम्मको ४.०७ किलोमिटर सडक निर्माणका लागि थपिएको समय सकिएको तीन महिना भयो । तर, काम भने ६० प्रतिशत मात्र हुँदै छ । ठेक्का सम्झौताको समय गत पुसमै सकिएको थियो । त्यसपछि साउन अन्तिमसम्म म्याद थपियो, तर थपिएको म्याद सकिएको तीन महिनासम्म सडक निर्माणले गति लिन नसकेको सडक डिभिजन कार्यालय दमकले जनाएको छ । 

बिर्तामोड–भद्रपुर सडकखण्डअन्तर्गत हर्चना कल्भर्टसम्म चार किलोमिटर चार लेनको सडक निर्माणका लागि २४ असार ०७५ मा आशिष–प्रेरा जेभीले १८ महिनामा सक्ने गरी २७ करोड नौ लाख ७० हजारमा ठेक्का लिएको थियो । २४ पुस ०७६ मा काम सम्पन्न नभएपछि साउन अन्तिमसम्मको समय थपिएको थियो । थपिएको समयमा पनि काम नसकेपछि आशिष–प्रेरा जेभीले पुनः म्याद थपका लागि सडक डिभिजन कार्यालय दमकमा निवेदन दिएको छ । तर, पहिलोपटक म्याद थपिएकाले सडक डिभिजन कार्यालयले म्याद थप्न सक्ने अवस्था नरहेको सडक डिभिजन कार्यालय दमकका प्रमुख रमेश पौडेलले जानकारी दिए ।

‘उहाँहरूले सार्वजनिक खरिद ऐनको नवौँ संशोधनअनुसार म्याद थपिसक्नुभएको छ । कोरोना महामारीका कारण भएको लकडाउनको समयपछि साउन अन्तिममा उहाँहरूको म्याद सकिएको हो । निर्माण कम्पनीले निवेदन दिएको छ । सरकारले लकडाउनमा रोकिएका कामका बारेमा केही निर्णय गर्छ कि भनेर पर्खिएका छौँ,’ पौडेलले नयाँ पत्रिकासँग भने, ‘अब म्याद थप्नुपर्दा मन्त्रिपरिषद्ले निर्णय गर्नुपर्छ । लकडाउनले असर गरेका ठेक्काका विषयमा निर्णय दसैँ र तिहारको बीचमा आउँछ भन्ने थियो । अब मन्त्रिपरिषद्मा पठाउने तयारी गर्दै छौँ ।’

महामारीले पार्‍यो असर
जिल्ला सदरमुकाम भद्रपुर जाने यो मुख्य सडक हो । बिर्तामोडबाट भद्रपुरसम्म १६ किलोमिटर दूरी छ । सुरुमा दुई दशमलव आठ किलोमिटर मात्र चार लेन बनाउने सम्झौता भए पनि पछि चार किलोमिटरसम्म नै चार लेनमा स्तरोन्नति गर्ने सम्झौता भएको थियो ।

सुरुबाटै सुस्त भएकाले समयमा काम नसकिएको सडक डिभिजनले जनाएको छ । ‘सार्वजनिक खरिद ऐनअनुसार एक वर्षसम्म म्याद थप्न पाइन्थ्यो । उहाँहरूले काम सकिन्छ भनेर सात महिना मात्र म्याद थप्नुभयो । तर, महामारीले काम गर्न नपाएका कारण थपिएको समयमा काम हुन पाएन,’ उनले भने, ‘अब काम गर्ने हो भने त दुई–तीन महिनामै काम सकिने अवस्था देखिन्छ ।’ सडकमा रहेको विद्युत्को पोल, खानेपानीको पाइपलगायत कारण काम गर्न ढिला भएको सडक डिभिजन दमकका सूचना अधिकारी अनुप साउदेनले बताए । 

मुआब्जा विवाद पनि एक कारण
सुरुवाती समयमा सडकछेउमा रहेका भौतिक संरचना हटाउँदा मुआब्जा विवादका कारण पनि काम गर्न समस्या आएको थियो । जसका कारण समयमै काम नभएको बताइएको छ । निर्माण सुरु गर्दाताका सडकआसपास रहेका घर भत्काउँदा स्थानीयले विरोध गरेका थिए । सरकारले उक्त क्षेत्रमा रहेका ४३ घरलाई दुई करोड ७३ लाख ८६ हजार क्षतिपूर्ति दिएपछि मात्र काम अघि बढेको थियो ।

सडकको हालसम्म ड्रेनको काम, कल्भर्ट निर्माण, ग्राभेल्स सकिएको साउदेनले बताए । यस्तै, बेस हाल्ने काम पनि भइरहेको उनको भनाइ छ । ‘अब संरचना निर्माणको काम अन्तिम चारणमा पुगेको छ । ग्राभेल पनि समग्रमा सकियो,’ उनले भने, ‘अब मेसिनको काम रहन्छ । यो त चाँडै बन्छ । धेरै समय लाग्दैन ।’

समयमै सडक नबन्दा सास्ती
समयमा निर्माण सम्पन्न नहुँदा त्यहाँ यात्रा गर्ने यात्रुदेखि स्थानीय व्यापारीसम्मले सास्ती व्यहोर्नुपरेको छ । सडकको धुलोले पसलका सबै सामान बिग्रने समस्या भएको व्यापारीहरू बताउँछन् । यस्तै, त्यो सडक भएर यात्रा गर्न नै मुस्किल भएको स्थानीय हरि अधिकारीले बताए । ‘पसलको सामानहरूमा उस्तै धुलो लागेको छ । यो बाटो त धुलोले हिँड्नै सकिँदैन,’ उनी भन्छन्, ‘चन्द्रगढी जाँदा पनि चारआलीको बाटो प्रयोग गर्नुपर्छ । यसरी समयमा काम गर्न नसक्ने निर्माण कम्पनीलाई त कारबाही गरे मात्र चेत्ने थिए ।’