पूर्व–पश्चिम राजमार्गअन्तर्गत रौतहटको धन्सारदेखि बागमतीसम्मको मुख्य सडकको मर्मत नहुँदा दुर्घटनाकोे जोखिम बढ्दै गएको छ ।
राजमार्गका विभिन्न स्थानमा भएको खाल्डाखुल्डी नपुरिँदा सवारीसाधन सञ्चालन गर्न असहज भइरहेको सवारीचालकहरूले बताएका छन् ।
दैनिक हजारौँ सवारीसाधन आवागमन गर्ने राजमार्ग नै भत्केर कुरूप बन्दा पनि सम्बन्धित निकायको ध्यान जान नसकेको स्थानीयवासी बताउँछन् ।
राजमार्गको चन्द्रनिगाहपुर बजार क्षेत्रमै सडक भत्केर ठाउँठाउँमा खाल्डा भएर दिउँसै धुलोले नाकमुख धुनेर हिँड्नुपर्ने बाध्यता रहेको स्थानीय बासिन्दा रवि रानामगरले बताए ।
राजमार्गका ठाउँठाउँमा गरिएको कालोपत्रे गत असार–साउन महिनाको अविरल वर्षाका कारण भत्केको झन्डै तीन महिना बिते पनि टालटुलसमेत हुन सकेका छैन ।
चन्द्रनिगाहपुरदेखि बागमती पुलसम्म खाल्डाखुल्डीका कारण राजमार्गको अवस्था अस्तव्यस्त बनेको स्थानीयवासीले बताएका छन् ।
राजमार्गको चाँदी र बागमती पुलमै खाल्डा भएका कारण सवारी दुर्घटनाको जोखिम बढ्दै जान थालेको सवारीचालक रंग तिमल्सिनाले बताए । सडकको बिग्रेको अवस्थाका कारण सवारीसाधन चाँडै बिग्रने तथा टायरसमेत बढी खिइने गरेको उनले बताए ।
राजमार्गमा रहेका समस्या समाधान गर्न सडक डिभिजन कार्यालय चन्द्रनिगाहपुरलाई पटकपटक जानकारी गराइए पनि कुनै चासो नदिएको चन्द्रनिगाहपुरका स्थानीय बासिन्दा राजु तिवारीले बताए ।
राजमार्गका केही स्थानमा सडक टुटफुट भएर खाल्डाखुल्डी हुँदासमेत सडक डिभिजन कार्यालय चन्द्रनिगाहपुरले कालोपत्रे गरेर दिगो समाधान गर्नेतर्फ ध्यान नदिएको स्थानीयवासीको आरोप छ ।
वर्षायाममा नै भत्किएको सडक अहिलेसम्म नबन्दा यात्रुका साथै स्थानीयवासीलाई सास्ती व्यहोर्नुपरेको छ ।
मुख्यमार्गमा पैदल आवतजावत गर्नेलाई पनि कठिनाइ भइरहेको छ । सडकमा जोखिम मोलेर भए पनि चालकले यातायात सेवा सञ्चालन गर्ने गरेका छन् ।
रौतहट क्षेत्र नं. ४ का संघीय सांसद देवप्रसाद तिमल्सिनाले पटकपटक सो विषयमा आफूले सडक डिभिजन कार्यालय चन्द्रनिगाहपुरमा जानकारी गराउँदासमेत कुनै वास्ता नभएको बताए ।
सडक डिभिजन कार्यालय चन्द्रनिगाहपुरका प्रमुख दरोगा साहले वर्षा र चाडबाडका कारण समयमा काम हुन नसकेको र अब तत्काल राजमार्गमा खाल्डामा कालोपत्रे गर्ने काम गर्न आफूले ठेकेदारलाई निर्देशन दिएको बताए ।