धापासी हाइटमा शुक्रबार २५ वर्षीय आशिष मगरको हत्या भएको छ । हत्यामा संलग्न दुई अभियुक्तलाई प्रहरीले पक्राउ गरेको छ ।
पक्राउ पर्ने २५ वर्षीय ग्यान्टे भनिने दिवश अधिकारी र रवि मगर रहेका छन् । प्रहरीका अनुसार उनीहरूले छुरा प्रहार गरी आशिषको हत्या गरेका थिए ।
उनको उपचारका क्रममा चिरायु अस्पतालमा मृत्यु भएको हो । घटनामा संलग्न अन्य दुई भने फरार रहेको प्रहरीको भनाइ छ ।
अनुसन्धानमा संलग्न महानगरीय अपराध महाशाखाका अनुसार आशिषको छातीमा छुरा प्रहार भएको छ । मुटुमा चोट पुगेकाले उनको धेरै रक्तश्राव भएको हो । सोही कारण उनको मृत्यु भएको महाशाखा प्रमुख एसएसपी दीपक थापाले बताए ।
‘मृतकको छातीमा छुरा प्रहार भएको देखिन्छ । चोट मुटुसम्म पुगेकाले रगत धेरै बगेको देखिन्छ । उनलाई उपचारका लागि अस्पताल त लगियो । तर, बचाउन सकिएन,’ महाशाखा प्रमुख एसएसपी थापाले भने ।
प्रहरीका अनुसार मृतक घरमा रङ लगाउने कार्यमा संलग्न छन् । हत्यामा संलग्न भने लागुऔषध गाँजाको दुर्व्यसनी रहेको प्रहरीले जानकारी दिएको छ । घटनामा संलग्न अन्य दुई पक्राउ परेपछि मात्रै घटनाको कारण खुल्ने एसएसपी थापाले बताए ।